काठमाडौं । प्रतिनिधिसभा विघटनपछि आफ्नो पक्षमा जनमत सिर्जना गर्न प्रधानमन्त्री आफैँ देश दौडाहामा लागेका छन् । यसबीच महेश बस्नेतबाहेक ओलीका खास मान्छेहरु खुलेर दौडाहामा हिँडेको पनि देखिँदैन । बस्नेतबाहेक ‘बा’ को पक्षमा सँसदीय दलका उपनेता सुवास नेम्वाङलगायत हस्तीहरु मेची–महाकाली नदौडनुको कारणबारे सबैमा कौतुहलता छ ।

शुरुका दिन एक दुई ठाउँमा पूर्व सरकारी प्रवक्ता गोकुल बाँस्कोटा गएका थिए । तर, उनी पनि एकाएक ब्याक भए । एकपटक चितवनमा खटाइएका बाँस्कोटालाई नरुचाएको पाइएपछि उनी काभ्रेतिरै केन्द्रित भएका हुन् । उनको उपस्थितिलाई जनताले ठ्याक्कै एक वर्षअघिको करोडौंको लेनदेन बिबादसँग जोडेपछि उल्टो परिणाम आउने डरले ब्याक गराइएको बताइन्छ । नेम्बाङ्गले पनि भित्रै बाट साथ नदिएको पाए पछि उनलाई न आफ्नो न पराईको अबस्थामा राखिएको हो। 

माओवादी जग्जगीको बेला वाइसियलसँग भिड्न युवा संघको नेतृत्व गरेकाले र देशभरि संघको नेटवर्क भएकाले उनको माग ७७ वटै जिल्लामा रहेको चर्चा छ । उनीहरुको तर्क छ ‘उनी जहाँ जान्छन् त्यहिँ माहौल सिर्जना गर्ने भएकाले बालुवाटारले अघि बढाएको हो ।’ मधेसी सांसद अपहरण प्रकरण र पूर्वएमाले दल दर्तामा संलग्न भएको आरोप लागे पनि युवाहरूलाई आकर्षित गर्न बस्नेतसँग खुबी रहेको उनका समर्थकहरुको दाबी छ । त्यसो त अहिलेका युवालाई ईश्वर पोखरेललगायत अघिल्लो पुस्ताका नेताले आश्वस्त तुल्याउन सक्ने अवस्था पनि देखिन्न । युवासंघभित्रैका रमेश पौडेल वा निरु पाललाई भाषण गराउँदा पनि माहौल तातेको पाइएन । किनभने पाललाई कञ्चनपुर र राजीव पहारीलाई पोखरामा समेत पत्याएको भेटिन्न ।

त्यसैगरी अखिलका नेता ऐन महरले पनि छवि सुधार्न नसकेपछि अरुभन्दा पछाडि परेका छन् । उनलाई अखिलभित्रैका धेरैले पत्याउँदैनन् भनिन्छ । पूर्व उपाध्यक्षहरू रश्मी आचार्य, महेश गड्तौला, शैलेश लामाले महरलाई कौडीको भाउमा पनि पत्याएका छैनन् । बरु अलिअलि सुनिता बरालले पत्याएको देखिन्छ । त्यसैले गुटमा पनि महर अल्पमतमा पुगेका हुन् ।

मधेसका मान्छे तान्ने क्रममा निर्वाचन भयो भने त्यहि ढंगले उम्मेदवार बनाउने भन्दै पहिलेका मन्त्री इस्तिहाक राइन र रिज्वान अन्सारीलगायतलाई फकाउने पहल पनि शुरु भएको छ । अहिले विभिन्न दलबाट भित्र्याइएका केही विवादास्पद फिगर त्यसैको रोडम्याप हो । राप्रपाका विक्रम पाण्डेलाई चितवनमा ‘भित्र्याउने’ र टिकट दिएर प्रचण्डलाई नै हराउने योजना निकै अघि बढेको स्रोतको दाबी छ । चाकडी गर्ने तर सिन्को भाच्न नसक्नेको जत्थामात्र देखे पछि ओली सबै तिर आफै भिड्नु परेको उनले आफु निकटका संग दुखेसो गर्ने गरेका छन् ।