२०८२ कार्तिक १९ गते बुधवार
२०८२ कार्तिक १९ गते बुधवार
विराटनगर । कोरोना संक्रमण पुष्टि भएपछि परिवारको जिम्मा लगाएर पठाइएका लागूऔषध मुद्दाका एक अभियुक्तले विराटनगरमा आत्महत्या गरेका छन् ।
विराटनगर महानगरपालिका–१३ का २८ वर्षीय वीरनारायण यादव आइतबार राति आफ्नै घरको पंखामा डोरीको पासो लगाएर झुण्डिएको अवस्थामा फेला परेको मोरङ प्रहरीका प्रवक्ता डीएसपी मानबहादुर राईले जानकारी दिए । उनका अनुसार झुण्डिएको अवस्थामा देखेपछि परिवारका सदस्यले डोरी काटेर उपचारका लागि कोसी अस्पताल ल्याएको खुलेको छ ।
अस्पताल ल्याइसकेपछि चिकित्सकले मृत घोषित गरेको डीएसपी राईले बताए । उनका अनुसार कोरोना संक्रमण तीव्र रूपमा फैलिरहेको भारतको जोगवनी बजारबाट लागूऔषध लिएर आउँदै गर्दा नेपाल–भारत सीमानजिक विराटनगर–१६ बाट यादव गत वैशाख २७ गते राति पक्राउ परेका थिए ।
यादवलाई नेपाल र सशस्त्र प्रहरीको संयुक्त टोलीले लागूऔषध स्पास्कोर भोन–प्लस ४८ चक्की, नाइट्राभेट ५८ चक्की र डाइलेक्स डिसी १० बोतलसहित पक्राउ गरेको थियो । खुट्टामा टेपले बाँधेर ल्याएको लागूऔषधसहित पक्राउ परेका यादवविरुद्ध इलाका प्रहरी कार्यालय रानीले लागूऔषध ऐनअन्तर्गतको मुद्दा चलाउन अदालतबाट म्याद थप गरेर अनुसन्धान थाल्यो ।
त्यस क्रममा पीसीआर परीक्षण गराउँदा उनको रिपोर्ट पोजेटिभ आइदियो । पीसीआर रिपोर्ट पोजेटिभ आएर कोरोना संक्रमण भएपछि यादवलाई जिल्ला अदालत मोरङले पछि उपस्थित गराउने शर्तमा परिवारका सदस्यको जिम्मा लगाएर पठाउन प्रहरीलाई आदेश दिएको थियो ।
संक्रमणमुक्त भएपछि लागूऔषध मुद्दामा कारबाही अघि बढाउन प्रहरीको जिम्मा लगाउने गरी गत जेठ ८ गते उनलाई परिवारका सदस्यको जिम्मा लगाएर पठाइएको हो । संक्रमणमुक्त नभएसम्मलाई ‘होम आइसोलेसन’मा राख्ने गरी परिवारका सदस्यले जिम्मा लिएर गएका यादवले भने घरमै झुण्डिएर आत्महत्या गरेको प्रारम्भिक अनुसन्धानबाट खुलेको डीएसपी राईले बताए ।
© 2025 All right reserved to khabarcnter.com | Site By : Sobij
