२०८३ आश्विन १३ गते मंगलवार
२०८३ आश्विन १३ गते मंगलवार
.gif)
काठमाडौं । लगातारको अविरल वर्षाका कारण सेती नदीमा पानीको बहाव बढेपछि पोखराको रामघाट क्षेत्रका बासिन्दालाई सुरक्षित स्थानमा जान आग्रह गरिएको छ । नदीको जलसतह बढ्दै गएपछि बस्ती डुबानमा पर्न सक्ने जोखिमलाई मध्यनजर गर्दै सुरक्षाकर्मीले रामघाट क्षेत्रमा माइकिङ गरेर स्थानीयलाई बस्ती छाड्न आग्रह गरेका हुन् ।
सुरक्षाकर्मीले स्थानीय बासिन्दालाई आफू र परिवारका सदस्यसँगै अत्यावश्यक सामान तथा महत्वपूर्ण कागजात लिएर सुरक्षित स्थानमा स्थानान्तरण हुन अनुरोध गरेका छन् । सेती नदीको बहाव तीव्र बन्दै गएपछि नदी किनारमा रहेका बस्तीमा जोखिम बढेको भन्दै स्थानीयलाई उच्च सतर्कता अपनाउन भनिएको छ ।
प्रहरीका अनुसार रामघाट क्षेत्रमा डुबानको जोखिम बढेकाले स्थानीयलाई सुरक्षित स्थानतर्फ जान आग्रह गरिएको हो । गीता मन्दिर, क्रियापुत्री भवन र लक्ष्मीनारायण मन्दिर क्षेत्र भने तुलनात्मक रूपमा सुरक्षित रहेको जनाउँदै आवश्यक परे ती स्थानतर्फ जान सकिने जानकारी दिइएको छ ।
पछिल्ला केही दिनदेखि भइरहेको निरन्तर वर्षाका कारण पोखरासहित देशका विभिन्न स्थानमा नदी तथा खोलामा पानीको बहाव बढेको छ । सेती नदीमा समेत पानीको सतह बढेपछि नदी तटीय क्षेत्रमा बसोबास गर्ने स्थानीय त्रसित बनेका छन् ।
प्रशासनले नदी किनार तथा जोखिमयुक्त क्षेत्रमा रहेका बासिन्दालाई अनावश्यक रूपमा नदीतर्फ नजान र मौसम तथा नदीको अवस्थाबारे सतर्क रहन आग्रह गरेको छ । कुनै आपतकालीन अवस्था सिर्जना भए तत्काल नजिकको प्रहरी कार्यालय वा सम्बन्धित सुरक्षा निकायमा सम्पर्क गर्न पनि प्रशासनले अनुरोध गरेको छ ।
© 2026 All right reserved to khabarcnter.com | Site By : Sobij
