२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । सुनसरीको धरान-१४ स्थित नरसिंह भगवान् मन्दिरको सार्वजनिक जग्गा गैरकानूनी रूपमा व्यक्तिको नाममा दर्ता गरी हिनामिना गरेको अभियोगमा साबिक धरान नगरपालिकाका तत्कालीन प्रशासकीय अधिकृतसहित ७ जनाविरुद्ध विशेष अदालतमा मुद्दा दायर गरिएको छ ।
अख्तियारले मन्दिरको स्वामित्वमा रहेको १० कठ्ठा ५ धुर सार्वजनिक जग्गा नक्कली जग्गाधनी खडा गरी व्यक्ति (पुजारी टिर्रु चौधरी) को नाममा नामसारी गरेको पुष्टि भएपछि मंगलबार मुद्दा दायर गरेको हो । उक्त जग्गाको न्यूनतम मूल्याङ्कन ३६ लाख १० हजार रुपैयाँ रहेको छ ।
आयोगले जनही ३६ लाख १० हजार रुपैयाँ बिगो कायम गरी देहायका व्यक्तिहरूलाई प्रतिवादी बनाएको छ:
१. गणेश प्रसाद खतिवडा: तत्कालीन प्रशासकीय अधिकृत, धरान नगरपालिका।
२. कपिलमणि दाहाल: तत्कालीन अध्यक्ष/सचिव, सिङ्गिया गाविस (निजले ५ हजार रूपैयाँ घुससमेत आरोपपत्रमा उल्लेख छ)।
३. सुशील वैध: तत्कालीन मालपोत अधिकृत, मालपोत कार्यालय सुनसरी।
४. तुङ्गनाथ भण्डारी: तत्कालीन शाखा अधिकृत, मालपोत कार्यालय सुनसरी।
५. केदार बहादुर कार्की: तत्कालीन नायब सुब्बा, मालपोत कार्यालय सुनसरी।
६. उत्तम आले: तत्कालीन वडा सचिव, धरान नगरपालिका वडा नं. १४।
७. टिर्रु चौधरी: मन्दिरका पुजारी (नक्कली जग्गाधनी)।
८. पंकज घिमिरे: स्थानीय जग्गा कारोबारी (मतियारको रूपमा)।
अनुसन्धानका क्रममा तत्कालीन सिङ्गिया गाविस र धरान नगरपालिका वडा नं. १४ बाट झुट्टा व्यहोराको सर्जमिन मुचुल्का तयार पार्न लगाई मन्दिरको जग्गा पुजारी तिरुवा चौधरीको नाममा नामसारी गर्न सिफारिस गरिएको पाइएको छ । सोही सिफारिसको आधारमा मालपोत कार्यालय सुनसरीले २०६५ जेठ २१ गते सार्वजनिक जग्गा व्यक्तिको नाममा दर्ता गर्ने निर्णय गरेको थियो ।
यसरी दर्ता गरिएको जग्गा पुजारी चौधरी र बिचौलिया पंकज घिमिरेको मिलेमतोमा बिक्रीसमेत गरिएको अख्तियारले जनाएको छ । आयोगले तत्कालीन गाविस सचिव कपिलमणि दाहालले जग्गा नामसारी गर्ने कार्यमा सहयोग गरेबापत ५ हजार रूपैयाँ घुस लिएको समेत फेला पारेको छ।
हाल भागमैनी थरुनीको नाममा रहेको उक्त जग्गा जफत गरी पुनः मन्दिरकै नाममा कायम गर्नसमेत विशेष अदालतमा मागदाबी लिइएको छ ।
© 2026 All right reserved to khabarcnter.com | Site By : Sobij
