२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । अमेरिकाको न्यू मेक्सिकोका एक न्यायाधीशले बालबालिकालाई सामाजिक सञ्जालका जोखिमबारे चेतावनी दिन असफल भएको भन्दै मेटालाई थप ५६७ मिलियन अमेरिकी डलर जरिवाना तिराउन आदेश दिएका छन्। यो बाल सुरक्षासम्बन्धी मुद्दामा मेटाविरुद्ध भएको अहिलेसम्मकै ठूलो फैसला हो।
न्यायाधीश ब्रायन बिड्सचाइडले मेटाका प्लेटफर्मले बालबालिकालाई हानिकारक सामग्री र यौन शोषणको जोखिममा पारेको भन्दै कम्पनीलाई “सार्वजनिक उपद्रव” को अवस्था सिर्जना गरेको बताएका छन्। जरिवानाको रकम भविष्यमा बालबालिकामाथि हुने यस्ता क्षति कम गर्न प्रयोग गरिने कोषमा राख्न आदेश दिइएको छ।
यसअघि यही मुद्दामा मेटालाई ३७५ मिलियन डलर जरिवाना तिराउने फैसला भएको थियो। नयाँ जरिवानासहित कम्पनीले कुल ९४२ मिलियन डलर तिर्नुपर्ने भएको छ।
मुद्दा सन् २०२३ मा न्यू मेक्सिको राज्यका अधिकारीहरूले दायर गरेका थिए। मेटाका फेसबुक, इन्स्टाग्राम, ह्वाट्सएप र थ्रेड्सजस्ता प्लेटफर्मले बालबालिकालाई यौन सामग्री र यौन अपराधीहरूको सम्पर्कमा पुर्याएको आरोप लगाइएको थियो।
अदालतले मेटाको सिफारिस प्रणालीले बाल प्रयोगकर्तालाई हानिकारक सामग्री र सम्पर्कतर्फ निर्देशित गरेको ठहर गरेको छ। मेटाले यसअघि लगाइएको ३७५ मिलियन डलर जरिवानाविरुद्ध अपिल गर्ने बताएको थियो।
© 2026 All right reserved to khabarcnter.com | Site By : Sobij
