२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौं । अविरल वर्षाका कारण आएको बाढी, पहिरो तथा सडक मर्मतका कारण देशका विभिन्न जिल्लाका मुख्य राजमार्ग प्रभावित भएका छन्।
सम्बन्धित निकायले शुक्रबार बिहान ९ बजेसम्मको अद्यावधिक विवरण सार्वजनिक गर्दै केही सडक पूर्ण रूपमा अवरुद्ध, केही एकतर्फी सञ्चालनमा रहेको र केही स्थानमा सवारी साधन सञ्चालनमा रोक लगाइएको जनाएको हो।
कोशी प्रदेश अन्तर्गत भोजपुरको भोजपुर नगरपालिका-७ स्थित मध्यपहाडी लोकमार्ग बाढीका कारण एकतर्फी सञ्चालनमा रहेको छ। इलामको रोङ गाउँपालिका-३ राउतबारीस्थित मेची राजमार्ग तथा तेह्रथुमको म्याङ्लुङ नगरपालिका-६ सिम्ले क्षेत्रमा रहेको मध्यपहाडी लोकमार्ग पहिरोका कारण एकतर्फी सञ्चालनमा छन्।
काभ्रेपलाञ्चोकको भकुण्डेबेँसी-नेपालथोक-धुलिखेल सडकखण्डमा सम्भावित बाढीको जोखिमका कारण सवारी सञ्चालनमा रोक लगाइएको छ। यस्तै, बीपी राजमार्गअन्तर्गत रोशी गाउँपालिका-११ कालढुंगा-चिसापानी क्षेत्रमा सडक एकतर्फी सञ्चालनमा छ।
मकवानपुरको इन्द्रसरोवर गाउँपालिका-२ र ५ महालक्ष्मी क्षेत्रमा पर्ने कुलेखानी-फाखेल हुँदै हुमाने-फाखेल-काठमाडौंतर्फको सडकखण्डमा मर्मत कार्य भइरहेकाले अत्यावश्यक बाहेकका सवारीसाधनलाई वैकल्पिक मार्ग प्रयोग गर्न आग्रह गरिएको छ।
चितवनको इच्छाकामना गाउँपालिका-५ पानीधारास्थित मुग्लिन-नारायणगढ सडकखण्ड पनि पहिरोका कारण प्रभावित भए पनि सञ्चालनमा रहेको छ।
© 2026 All right reserved to khabarcnter.com | Site By : Sobij
