सुरुङ खनेर तीन घरमा चोरी

आषाढ ४, २०८३ बिहिवार

1.5K

काठमाडौं । रौतहटको पश्चिमी भेगस्थित फतुवा विजयपुर नगरपालिका–६ मोतिपुर टोलमा बुधबार राति अज्ञात समूहले तीन घरमा सुरुङ खनेर प्रवेश गर्दै नगद तथा सुनचाँदीका गहना चोरी गरेको प्रहरीले जनाएको छ ।

चोरहरू मध्यरातमा घरका सदस्यहरू गहिरो निद्रामा रहेका बेला रामप्रसाद यादव, तेजनारायण यादव र गजेन्द्र सहनीको घरमा पालैपालो सुरुङ खनेर प्रवेश गरेका थिए।

पीडित परिवारका अनुसार रामप्रसाद यादवको घरभित्र रहेको ट्रङ्कको ताला खोलेर चोरहरूले नगद २ लाख ८० हजार रुपैयाँ तथा करिब २ लाख ४० हजार रुपैयाँ बराबरको सुनको मंगलसूत्र र हनुमानी चोरी गरेका छन्।

त्यसैगरी तेजनारायण यादवको घरभित्र रहेको बाकसाको ताला खोलेर करिब २० हजार रुपैयाँ मूल्य बराबरका तीन थान चाँदीका बालबालिकाले लगाउने हातका बाला चोरी गरिएको जनाइएको छ।

यस्तै गजेन्द्र सहनीको घरमा समेत चोरहरू प्रवेश गरे पनि कुनै सामान चोरी भने नभएको स्थानीयले बताएका छन्।

घटनाको जानकारी पाएपछि इलाका प्रहरी कार्यालय विजयपुरको टोली घटनास्थल पुगेको थियो। फतुवा विजयपुर-६ का वडा अध्यक्ष रामएकवाल यादवले ट्रङ्क र बाकसाको ताला सहज रूपमा खुलेको अवस्थामा भेटिएकाले चोरहरूले नक्कली चाबी प्रयोग गरेको हुनसक्ने अनुमान गरिएको बताएका छन्। घटनाबारे थप अनुसन्धान भइरहेको प्रहरीले जनाएको छ।

प्रकाशित मिति :आषाढ ४ २०८३ बिहिवार - १२:०२:२० बजे

प्रतिक्रिया