२०८३ बैशाख २२ गते मंगलवार
२०८३ बैशाख २२ गते मंगलवार
काठमाडौं । नेपाल प्रहरीको साइबर ब्युरोको नाम दुरुपयोग गरी अनलाइन ठगीमा संलग्न गिरोहका चार जना पक्राउ परेका छन् । केन्द्रीय साइबर ब्युरोले इलाका प्रहरी कार्यालय धरानसँगको समन्वयमा आइतबार उनीहरूलाई धरानबाट पक्राउ गरेको हो ।
पक्राउ पर्नेहरूमा दीपक लिम्बु, सौरभ भुजेल,सजल राई र सृजन थापा रहेका छन् । उनिहरुलाई आइतबार राति नै काठमाडौँ ल्याइएको साइबर ब्युरोका प्रवक्ता एवम् सूचना अधिकारी प्रहरी उपरीक्षक दिलीप कुमार गिरीले जानकारी दिएका छन् ।
उनीहरूविरुद्ध विद्युतीय माध्यमबाट हुने ठगी (साइबर अपराध) को कसुरमा जिल्ला अदालत काठमाडौँबाट चार दिनको म्याद थप गरी विस्तृत अनुसन्धान सुरु गरिएको गिरीले बताएका छन् ।
प्रवक्ता गिरीका अनुसार गिरोहले टेलिग्राममार्फत पहिले नै ठगीमा परेका व्यक्तिहरूलाई पुनः निशाना बनाउने गरेको थियो । टेलिग्राम स्क्याममा परेका पीडितहरूलाई साइबर ब्युरोको अधिकारी बनेर फोन गर्ने र विश्वास दिलाउनका लागि ‘ट्रु कलर’ पमा समेत आफ्नो नम्बरमा ‘साइबर ब्युरो’ नाम देखिने बनाएका थिए।
आरोपीहरूले पीडितलाई “तपाईँ पनि कारबाहीमा पर्न सक्नुहुन्छ” भन्दै डर देखाउने र कानुनी प्रक्रियाबाट बच्नका लागि रकम माग गर्ने गरेको प्रारम्भिक अनुसन्धानबाट खुलेको छ ।
पक्राउ परेकाहरूले ठगीमा परेका व्यक्तिहरूको विवरण कहाँबाट प्राप्त गरे र हालसम्म कति रकम ठगी गरे भन्ने विषयमा ब्युरोले गहिरो अनुसन्धान गरिरहेको छ । साथै, यो गिरोह यसअघि अन्य किसिमका ठगी वा आपराधिक गतिविधिमा संलग्न भएरनभएको बारे पनि अनुसन्धान भइरहेको प्रवक्ता गिरीले बताएका छन् ।
© 2026 All right reserved to khabarcnter.com | Site By : Sobij
