२०८२ फाल्गुण १३ गते बुधवार
२०८२ फाल्गुण १३ गते बुधवार
काठमाडौं । राँचीबाट दिल्लीका लागि उडेको एक एयर एम्बुलेन्स सोमबार राति झारखण्डको चतरा जिल्लामा दुर्घटनाग्रस्त भएको छ। उक्त दुर्घटनामा परि विमानमा सवार एक बिरामी, दुई पाइलट र मेडिकल टिमसहित ७ जनाको घटनास्थलमै मृत्यु भएको भारतीय सञ्चारमाध्यमले जनाएको छ ।
रेडबर्ड एयरवेजद्वारा सञ्चालित बीचक्राफ्ट C90 (Beechcraft C90) विमानले राँचीको बिरसा मुण्डा विमानस्थलबाट बेलुकी ७:११ बजे उडान भरेको थियो। उडान भरेको करिब २३ मिनेटपछि ७:३४ बजे कोलकाता एअर ट्राफिक कन्ट्रोलसँग सम्पर्क टुटेको थियो।
अधिकारीका अनुसार खराब मौसमका कारण पाइलटले रुट परिवर्तन गर्ने अनुमति मागेका थिए, तर त्यसको केही समयमै विमान राडारबाट गायब भयो र चतराको सिमरियास्थित घना जंगलमा दुर्घटनाग्रस्त भयो। दुर्घटनामा ज्यान गुमाउनेहरूमा बिरामी ४१ वर्षीय सञ्जय कुमार रहेका छन्। उनलाई ६५ प्रतिशत जलेको अवस्थामा उपचारका लागि दिल्ली लगिदै थियो ।
त्यस्तै मृत्यु हुनेमा चिकित्सक टोली डा. विकास कुमार गुप्ता र प्यारामेडिक सचिन कुमार मिश्र रहेका छन् भने सहयोगीहरू अर्चना देवी र धुरु कुमार रहेका छन्। पाइलटहरू क्याप्टेन विवेक विकास भगत र क्याप्टेन सवरजदीप सिंहको मृत्यु भएको हो ।
राँची विमानस्थलका निर्देशक विनोद कुमारले प्रारम्भिक रूपमा खराब मौसम र मेघगर्जनलाई दुर्घटनाको कारण मानिए पनि वास्तविक तथ्य ब्ल्याक बक्सको अध्ययन र विस्तृत अनुसन्धानपछि मात्र खुल्ने बताएका छन्।
© 2026 All right reserved to khabarcnter.com | Site By : Sobij
