२०८२ फाल्गुण २८ गते बिहिवार
२०८२ फाल्गुण २८ गते बिहिवार
काठमाडौं । भारतको मद्रास उच्च अदालतले मन्दिरले गर्ने कार्यमा निमन्त्रणा पत्र पठाउँदा जात उल्लेख नगर्न आदेश दिएको छ ।
अदालतले हिन्दू धार्मिक र परोपकारी बन्दोबस्त विभागमार्फत राज्यले सञ्चालन गर्ने मन्दिरका उत्सवहरूले जातप्रथालाई निरन्तरता दिन नहुने फैसला सुनाएको हो ।
अदालतले देशका हरेक निकायको प्रयास जातप्रथाको उन्मूलन गर्ने हुनुपर्ने र यसलाई बढवा दिने खालको हुनु नहुने कुरामा जोड दिएको छ । मन्दिरको उत्सवमा निमन्त्रणा पत्रहरूमा जात प्रयोग गरेर जातप्रथालाई निरन्तरता दिन अनुमति दिन नसकिने अदालतको ठहर छ ।
सुनुवाइका क्रममा राज्य सरकारले मन्दिरले आफैँले कुनै जातको नाम प्रयोग नगरेको, तर निमन्त्रणा पत्रमा व्यक्तिको नामसँगै उनीहरूको जातको नाम छापिएको जानकारी दिएको थियो । निमन्त्रणा पत्रहरू छापिसकिएकाले यस वर्षका लागि कुनै नयाँ निर्देशन जारी गर्न नसकिने मन्दिर व्यवस्थापनको तर्क थियो । तर, अदालतले आगामी उत्सवहरूदेखि यदि कसैले आफ्नो नामको पछाडि जात जोडेको भए, उक्त जातको अंश हटाएर केवल नाम मात्र छाप्नुपर्ने आदेश दिएको छ ।
© 2026 All right reserved to khabarcnter.com | Site By : Sobij
