काठमाडौं । सञ्चार तथा सुचना प्रविधिमन्त्री जगदीश खरेलले चरम राजनीतिक प्रभावको कारणले नेपाल पत्रकार महासंघको इतिहास मोडिएको बताएका छन् ।

सत्य र तथ्य सूचना सम्प्रेषण गर्नुपर्ने पत्रकारहरुकै इतिहास मेटिनु गलत भएको उनको भनाइ छ । नेवाः पत्रकार राष्ट्रिय दबूले ललितपुरमा गरेको एक कार्यक्रममा नेपाल पत्रकार महासंघका संस्थापक अध्यक्ष सत्यनारायण बहादुर श्रेष्ठको विषयमा चर्चा गर्ने सन्दर्भमा मन्त्री खरेलले उक्त धारणा राखेका हुन् । मन्त्री खरेलले सत्य र तथ्य दस्ताबेज प्रस्तुत गर्नसमेत आवहान गरे । वास्तविक तथ्य उपलब्ध भएको अवस्थामा सत्यनारायण बहादुर श्रेष्ठलाई नेपाल पत्रकार महासंघको संस्थापक अध्यक्ष बनाउन पहल गर्ने आश्वासन मन्त्री खरेलले दिए ।

सोही कार्यक्रममा सत्यनारायण बहादुर श्रेष्ठकी कान्छी छोरी सुजिता मानन्धरले आफ्ना बुवाले पत्रकारिता र शिक्षा क्षेत्रमा गरेको योगदानको विषयमा चर्चा गरिन् । तत्कालीन राणा शासकका कदृष्टिका कारणले निर्वासित जीवन बिताउन भारतको कलकता पुगेका श्रेष्ठले बहुदलीय प्रजातन्त्र पश्चात् नेपाल फर्किएर पुनः शिक्षा क्षेत्रमा काम गरेको चर्चा उनले कार्यक्रममा गरिन् ।

नेपाल पत्रकार महासंघका संस्थापक अध्यक्ष सत्यनारायण बहादुर श्रेष्ठको ११० औं जन्मजयन्तीको अवसरमा सम्पन्न भएको कार्यक्रममा सञ्चारकर्मीद्वय प्रकृति अधिकारी र रामकृष्ण कर्माचार्यलाई सम्मान गरिएको थियो । अधिकारीलाई ‘सत्यनारायण बहादुर श्रेष्ठ प्रेस स्वतन्त्रता सेनानी पुरस्कार ११४६’ प्रदान गरिएको थियो । गोरखापत्र राष्ट्रिय दैनिकका सहसम्पादक अधिकारीलाई नगद राशी २५ हजार समेत हस्तान्तरण गरिएको थियो ।

त्यस्तै सत्यनारायण बहादुर श्रेष्ठ प्रेस स्वतन्त्रता सेनानी सम्मान ११४६ बाट श्रेष्ठका सहकर्मी वरिष्ठ पत्रकार रामकृष्ण कमाचार्यलाई सम्मानित गरिएको थियो । कार्यक्रममा तेस्रो मिडिया कप फुटसल प्रतियोगितामा पुरुषतर्फ ललितपुर महानगरपालिका वडा नं. १६ कलाकार समिति र ललितपुरकै महिला पत्रकारहरुलाई उत्कृष्ट भएबापत प्रमाणपत्र, ट्रफी र पदक प्रदान गरिएको थियो ।

नेपाल पत्रकार महासंघका संस्थापक अध्यक्षको रुपमा श्रेष्ठलाई स्थापित गर्न नेवाः पत्रकार राष्ट्रिय दबूले एक दशकदेखि निरन्तर अभियान सञ्चालन गर्दैआएको कार्यक्रम संयोजक राजु नापितले बताए । श्रेष्ठको नेतृत्वमा २००८ वैशाख ९ गते नेपाली पत्रकारहरुकै सबभन्दा पहिलो पेशागत संगठनको रुपमा नेपाल पत्रकार संघ गठन भएको थियो । समग्र पत्रकारलाई संगठित गर्ने उद्देश्यले संघ गठन भएको एक वर्षपछि २००९ वैशाख २८ गते श्रेष्ठकै नेतृत्वमा संघ पुनर्गठन भएको इतिहास छ ।

नेपाल टुडेका सम्पादक समेत रहेका श्रेष्ठको नेतृत्वमा गठन भएको पत्रकार संघलाई कालान्तरमा नेपाल पत्रकार महासंघ बनाएको हो । तर २०१२ चैत १६ गते पुनर्गठन गरिएको महासंघमा नेपाल पुकारका सम्पादक एवं सन्त नेता कृष्णप्रसाद भट्टराई उपाध्यायको नाम उल्लेख रहेको छ ।

फुटसल प्रतियोगितामा पत्रकार, कलाकार तथा अन्य पेशागत संघसस्थामा आवद्ध रहेका १० वटा खेलप्रेमीहरुको टिमले सहभागिता जनाएको फुटसलतर्फका संयोजक प्रजित शाक्यले बताए । पत्रकार राष्ट्रिय दबूका केन्द्रीय अध्यक्ष नृपेन्द्रलाल श्रेष्ठको सभापतित्वमा सम्पन्न भएको कार्यक्रममा नेपाल आदिवासी जनजाति पत्रकार महासंघ (फोनिज) का संघीय अध्यक्ष लक्की चौधरी, ललितपुर महानगरपालिका वडा नंं। ५ का वडाध्यक्ष विकास मान श्रेष्ठ, १६ का वडाध्यक्ष निर्मलरत्न शाक्य, तामाङ पत्रकार संघका प्रतिनिधि, ताम्राकार समाजका प्रतिनिधिदेखि सञ्चारकर्मीहरुको उलेख्य सहभागिता थियो ।