२०८२ आश्विन २६ गते आइतवार
२०८२ आश्विन २६ गते आइतवार
काठमाडौं । चितवनमा जापानिज इन्सेफ्लाइटिसका कारण मृत्यु हुनेको संख्या ६ पुगेको छ ।
जनस्वास्थ्य कार्यालयका अनुसार, मृत्यु हुनेमा दुई जना भरतपुर महानगरपालिका, एक जना खैरहनी नगरपालिका, दुई जना राप्ती नगरपालिका र एक कालिका नगरपालिकाका रहेका छन् । पछिल्लोपटक खैरहनी वडा नम्बर ४ की महिलाको यस रोगका कारण मृत्यु भएको कार्यालयका किट नियन्त्रक राम केसीले जानकारी दिएका छन् ।
जिल्लामा हालसम्म १७ जनामा यो रोगको संक्रमण देखा परेको छ । त्यसमध्ये १० महिला हुन भने सात पुरुष रहेका छन् । उनीहरूमध्ये तीन जना १५ वर्षमुनिका, पाँच जना १५ देखि ६० वर्षभित्रका र नौ जना ६० वर्षमाथिका छन् । संक्रमितमध्ये १५ जनाले खोप नलगाएको र दुई जनाले खोप लगाएको केसीले जानकारी दिएका छन् ।
संक्रमितमध्ये सात जना भरतपुरभित्रका छन् । मृत्यु भएकामध्ये एक ८९ वर्षका, अर्का एक जना ८१ वर्षका र दुई जना ७० वर्षका रहेका छन् । एक जना ३९ वर्षीय र अर्का एक जना ४२ वर्षका रहेको उनले जानकारी दिएका छन् ।
यो रोग क्युलेक्स जातको पोथी लामखुट्टेको टोकाइबाट सर्ने किटजन्य सरुवा रोग हो । यो लामखुट्टे घर बाहिर बस्न रुचाउने, घर बाहिर नै टोक्ने, साँझ र बिहान बढी सक्रिय हुने गर्छ । यो लामखुट्टेले सुँगुर, बंगुर, हाँसजस्ता पशुपन्छीलाई टोक्यो भने सर्छ । धानखेतीमा समेत यस लामखुट्टेले अन्डा पारेर लार्भा बनाउने गरेको कार्यालयका प्रमुख दिनेश रूपाखेतीले जानकारी दिएका छन् ।
© 2025 All right reserved to khabarcnter.com | Site By : Sobij
