२०८२ भाद्र १ गते आइतवार
२०८२ भाद्र १ गते आइतवार
काठमाडौं । प्रधानमन्त्री केपी शर्मा ओलीले भारत भ्रमणका लागि औपचारिक निम्तो पाएका छन् । नेपाल भ्रमणमा आएका भारतीय विदेश सचिव विक्रम मिस्रीले प्रधानमन्त्री नरेन्द्र मोदीले पठाएको निमन्त्रणा पत्र प्रधानमन्त्री ओलीलाई हस्तान्तरण गरेको प्रधानमन्त्री ओलीका मुख्य सल्लाहकार विष्णु रिमालले बताए ।
आज बिहान नेपाल भ्रमणमा आएका सचिव मिस्रीले सिंहदरबारमा प्रधानमन्त्री ओलीसँग भेटघाट गर्ने क्रममा सो निमन्त्रणा पत्र बुझाएका हुन् । यद्यपि प्रधानमन्त्री कहिले भारत भ्रमणमा जाने त्यो कुरा अझै टुँगो नलागेको प्रधानमन्त्री कार्यालय स्रोतले जनाएको छ ।
प्रधानमन्त्री कार्यालय स्रोतले भन्यो, ‘प्रधानमन्त्री ओली भारत भ्रमणमा जाने निश्चित भयो अब कहिले जाने त्यो विषयमा दुवै देशका विदेश मन्त्रालयले मिति तय गर्नेछ ।’
यद्यपि भदौ ३१ गते प्रधानमन्त्री ओली भारत भ्रमणमा जाने भनी यसअघि नै समाचार सार्वजनिक भइसकेको छ तर त्यसको पुष्टि हालसम्म न भारतीय पक्षले गरेको छ न नेपालले गरेको छ । प्रधानमन्त्री ओली दुई दिनसम्म भारत भ्रमणमा रहने बताइएको छ । यद्यपि भ्रमण लम्ब्याउने कुराकानी भइरहेको समेत स्रोतले दाबी गरेको छ ।
विदेश सचिव मिस्रीले आजै राष्ट्रपति रामचन्द्र पौडेललाई भेटेका छन् । त्यसपछि उनले कांग्रेसका सभापति शेरबहादुर देउवा र माओवादी केन्द्रका अध्यक्ष प्रचण्डलाई पनि भेट्ने कार्यक्रम रहेको बताइएको छ ।
आजै उनले परराष्ट्रमन्त्री डा।आरजु राणा देउवासँग भेटघाट गरी परराष्ट्र सचिव अमृतबहादुर राईसँग दुई पक्षीय भेटवार्ता गर्ने बताइएको छ ।
© 2025 All right reserved to khabarcnter.com | Site By : Sobij
