२०८२ भाद्र १ गते आइतवार
२०८२ भाद्र १ गते आइतवार
काठमाडौं । नेपालमा पहिलोपटक एसियन पावरलिफ्टिङ च्याम्पियनसिप आयोजना गरिने भएको छ । आज बुधबार पत्रकार सम्मेलन गरी नेपाली युथ फिटनेस एन्ड केलिसथेनिक्सले प्रतियोगिताबारे जानकारी गराएको हो ।
यही साउन ३०, ३१ र आउँदो भदौ १ गते प्रतियोगिता आयोजना गरिने नेपाली युथ फिटनेस एन्ड केलिसथेनिक्सले जानकारी दिएको छ । प्रतियोगिताका सबै खेल काठमाडौंको नेपाल पुलिस क्लब परिसरमा सञ्चालन गरिने भएको छ ।
नेपाल, भारत, अष्ट्रेलिया, श्रीलंका, पाकिस्तानसहित ६ राष्ट्रका १२० भन्दा बढी खेलाडीहरू प्रतियोगितामा सहभागी हुनेछन् । प्रतियोगिता १६ तौल समूह (८ पुरुष, ८ महिला) र १२ उमेर समूह (६ पुरुष, ६ महिला) मा गरी १२८ समूहमा सञ्चालन हुनेछ।
प्रतियोगितामा ओपन पावरलिफ्टिङ, डेड लिफटिङ, बेन्च प्रेस, बेन्च प्रेस एन्ड डेड लिफ्ट गरी चार विधामा प्रतिस्पर्धा हुने भएको छ भने यी विधाअन्तर्गत १६ तौल र १२ उमेर समूहमा प्रतिस्पर्धा हुने छ ।
तौलअन्तर्गत पुरुष र महिलातर्फ समान आठ समूह छुट्ट्याइएको छ भने उमेरअन्तर्गत महिला र पुरुषतर्फ समान ६ समूह छुट्ट्याइएको छ ।
उमेर समूहमा ४० देखि ८४ वर्ष उमेर समूह सम्म हुनेछ भने यू-१८ (जुनियर) र यू-२३ (युथ) को पनि स्पर्धा हुनेछ । प्रतियोगितामा १७ महिलासहित ४९ नेपाली खेलाडीहरू सहभागी हुनेछन् भने हालसम्म ५२ भारतीय खोलडी सहभागी हुने पक्का भएको छ ।
प्रतियोगितामा पदक विजेताहरूलाई मेडल, ट्रफी र आकर्षक उपहार, साथै ५ खेलाडीलाई १० लाख रुपैयाँ बराबरको एक वर्षे बीमा पुरस्कारस्वरूप प्रदान गरिनेछ ।
© 2025 All right reserved to khabarcnter.com | Site By : Sobij
