काठमाडौं । रसुवागढीमा बेलिवृज राख्नेबारे नेपाल र चीन सरकारबिच सहमति भएको छ । बिहीबार भौतिक पूर्वाधार तथा यातायात मन्त्रालयमा चीनका राजदूत चेन सोङसँग दसैँअघि बेलिब्रिज जडान गर्ने सहमति भएको भौतिक पूर्वाधार तथा यातायात मन्त्रालयका सचिव केशवकुमार शर्माले  बताए । 

‘आज नेपालका लागि चिनियाँ राजदूत चेन सोङसँग छलफल भएको थियो । उहाँसँग एकदमै सकारात्मक छलफल भएको छ,’ सचिव शर्माले भने,‘ दसैँअघि बेलिब्रिज जडान गर्ने सहमति भएको छ ।’ 

स्याफ्रुबेँसी–रसुवागढी सडक मर्मतको काम अन्तिम चरणमा पुगेको छ  । सडक भोलि (शुक्रबार) भित्र खुलाउने गरी काम भइरहेको सडक विभागले जनाएको छ  । 

सडक विभागका सङ्घीय सडक सुपरिवेक्षण तथा अनुगमन कार्यालय प्रमुख तथा सुपरिटेन्डेन इन्जिनियर शुभराज न्यौपानेले शुक्रबारदेखि खुल्ने जानकारी दिए । ‘लिङलिङको एउटा प्वइन्ट बाँकी छ । अरू सबै ठाउँमा वान वे ट्रयाक खुलिसक्यो । अब त्यो ठाउँमा ५० मिटर सडक अलिकति क्रिटिकल छ । माथि पहिरो छ, तल खोलाले हानेको छ । त्यो बाटो खोल्न बाँकी छ । अरू खुलिसकेको छ । ’

उनका अनुसार स्याफ्रुबेँसी बाट रसुवागढीसम्मको १६ किमी सडकमध्ये रसुवागढी, टिमुरे, लिङलिङ र रोंगा क्षेत्रमा करिब १.१ किमी सडकमा बाढीले क्षति गरेको थियो । यो सबै मर्मत भइसकेको जनाइएको छ ।

कसरी भइरहेको छ  सडक मर्मत ? 

गल्छी–त्रिशूली–मैलुङ–स्याफ्रुवेशी–रसुवागढी सडक योजनाका सब–इन्जिनियर तथा प्राविधिक रूपनारायण पौडेलले स्याफ्रुुवेशी सडक खुलाउनका लागि योजना प्रमुखसहितको टिम फिल्डमा खटिरहेको बताए । 

‘यो सडक खुलाउन त लागिराखेका छौँ । अब सम्भवतः भोलिसम्ममा चैँ खुल्छ होला । हामी चैँ सकभर अब छिट्टै खोल्ने भनेर लागिराखेको हो । अब सम्भवतः भोलि खुल्छ होला । योजना प्रमुखसहित सात जनाको टिम फिल्डमै छौँ ,’ उनले भने, ‘तीन वटा एक्स्काभेटर प्रयोग गरेर बाटो खुलाउने काम भइरहेको छ ।’

मितेरी खोलाको पुलका विषयमा दुई देशबिच समन्वय भइरहेको उनले बताए । नेपालतर्फबाट पुल पुनर्निमाणका लागि तत्काल सामग्री लैजान सकिने अवस्था नभएको बताए । ‘चीनतर्फबाटै सामग्री ल्याएर बनाउन सकिन्छ । यताबाट सामान लैजान मिल्दैन । उताबाट चीन सरकारले नै गर्छ होला ।’

उक्त सडकमा कस्ता सवारी चलाउन सकिने सडक खुला भएपछि मात्रै थाहा हुने उनले बताए ।  रसुवाको भोटेकोसी नदीमा आएको बाढीले स्याफ्रुबेंसी–रसुवागढी सडक खण्ड बगाएपछि चीनसँगको व्यापारिक नाका ९ दिनदेखि ठप्प छ । असार २४ गते आएको बाढीले करिब १ किलोमिटर सडक बगाउँदा टिमुरे र रसुवागढीबिचको सम्पर्क पूर्ण रूपमा विच्छेद भएको थियो ।