२०८२ भाद्र २ गते सोमवार
२०८२ भाद्र २ गते सोमवार
कैलाली । कैलालीको धनगढीस्थित सेती प्रादेशिक अस्पतालमा उपचाररत एक जना कोरोना सङ्क्रमित पुरुषको मृत्यु भएको छ ।
जिल्लाको गोदावरी नगरपालिका वडा नम्बर ३ का ५० वर्षीय पुरुषको मृत्यु भएको अस्पतालका सूचना अधिकारी दिलीप कुमार श्रेष्ठले बताए ।
उनमा आइतवार मात्रै कोरोना सङ्क्रमण पुष्टि भएको थियो । सङ्क्रमण पुष्टि भएपछि उनलाई आइतवार राती साढे ८ बजे अस्पताल भर्ना गरिएको र उपचारका क्रममा सेतीस्थित अस्थायी कोरोना अस्पतालको भेन्टिलेटरमा सोमबार बिहान ७ बजे उनको मृत्यु भएको हो ।
उनमा कडा खाले निमोनिया रहेकोले श्वासप्रश्वासमा जटिल समस्या देखिएको श्रेष्ठको भनाइ छ । मृतकको शव व्यवस्थापनको लागि नेपाली सेनासँग समन्वय भइरहेको अस्पतालले जनाएको छ । उनी फागुन पहिलो साता भारतबाट आएका थिए । सुदूरपश्चिममा नयाँ भेरियन्टको कोरोना देखिए पनि उनको मृत्यु कुन भेरियन्टको कोरोनाबाट भएको भन्ने पुष्टि हुनसकेको छैन ।
नयाँ हो कि पुरानो भेरियन्ट छुट्याउन नमुना काठमाडौँ पठाउनुपर्ने र कुन मुलुकमा फैलिएको भेरियन्ट भनेर पत्ता लगाउन भने नमुना विदेश पठाउनुपर्ने बाध्यता छ । मृतकको स्वाबको नमुना सङ्कलन गरेर राखिएको र भेरियन्ट पत्ता लगाउन पठाउने वा न पठाउने भन्ने विषयमा छलफल भइरहेको अस्पतालले जनाएको छ ।
© 2025 All right reserved to khabarcnter.com | Site By : Sobij
