२०८२ कार्तिक १९ गते बुधवार
२०८२ कार्तिक १९ गते बुधवार
काठमाडौं । नेपाल कम्युनिष्ट पार्टी (नेकपा) निर्वाचनमा भाग नलिने भएको छ । आसन्न मंसिर १६ मा हुने स्थानीय तहको उपनिर्वाचनमा नेकपाले भाग नलिने भएको हो ।
उक्त निर्वाचनका लागि निर्वाचन आयोगले असोज १०–१६ सम्म दल दर्ता आह्वान गरेको थियो । तर, नेकपाले तोकिएको अवधिमा दल दर्ता नगरेको आयोगका प्रवक्ता शालिग्राम शर्मा पौडेलले जानकारी दिए ।
उनका अनुसार एक हप्ताको समयावधिमा २५ दल दर्ता भएका छन् । जसअन्तर्गत नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी दर्ता भएको छैन ।
नेकपाले आसन्न मंसिरमा हुने स्थानीय उपनिर्वाचनमा भाग लिनेबारे कुनै निर्णय नै नगरेको पार्टी सचिवालय सदस्य कर्णजित बुढाथोकीले बताए । उनले भने, ‘हामीले निर्वाचनमा भाग लिने वा नलिने भन्नेबारे हालसम्म निर्णय गरेका छैनौँ । सायद निर्वाचनमा भाग नलिने निश्चित जस्तै छ । किनकि हामीले दल दर्ता गरेका छैनौँ र यस्तो अवस्थामा निर्वाचनमा भाग लिने भन्ने हुँदैन ।’
गत बैशाख १८ मा बसेको नेकपा पाँचौ केन्द्रीय समिति बैठकले निर्वाचनमा भाग लिने निर्णय गरेको थियो । बैठकमा केन्द्रीय समितिले दलाल पुँजीवादी सत्ता र संसदीय व्यवस्थालाई नेपाली विशेषताको समाजवादमा परिवर्तन गर्न सम्भव भएसम्म सबै तरिका र माध्यमहरूलाई प्रयोग गर्ने निर्णय भएको बताइएको थियो ।
नेकपाले आगामी २०८४ को स्थानीय, प्रदेश र संघीय निर्वाचनमा समेत भाग लिने निर्णयसमेत गरेको छ । तथापि आसन्न मंसिरमा हुने स्थानीय तहको उपनिर्वाचनमा नेकपाले भाग नलिने भएको छ ।
यस्तो अवस्थामा नेकपाले माओवादी केन्द्रलाई सघाउन सक्छ भन्ने खबरसेन्टरको प्रश्नको जवाफमा बुढा भन्छन्, ‘माओवादी वा अन्य कुनै दललाई सघाउने भन्नेबारे पार्टीमा आधिकारिक निर्णय नभएसम्म भन्न मिल्दैन । तर, माओवादी केन्द्रलाई सघाउने कुरामा दुईमत हुँदैन । यसका लागि पार्टीले निर्णय गर्छ, गर्नेछ ।’
माओवादी केन्द्रले आगामी निर्वाचनमा भने एक्लै लड्ने दाबी गरेको छ । आइतबार प्रेस सेन्टर नेपाल चितवन शाखाले भरतपुर विमानस्थलमा आयोजना गरेको पत्रकार सम्मेलनमा अध्यक्ष प्रचण्डले माओवादी केन्द्र एक्लै चुनाव लडेर बहुमत ल्याउने दाबी गरेका छन् ।
© 2025 All right reserved to khabarcnter.com | Site By : Sobij
