काठमाडौं । माओवादी निकट विद्यार्थी संगठन अखिल (क्रान्तिकारी)का प्रतिनिधिले निर्वाचन गर्नेमा जोड दिएका छन् । उनीहरूले नयाँ नेतृत्व चयनका लागि निर्वाचन गर्नेमा जोड दिएका हुन् ।

‘भ्रष्टाचारको अन्त्य र सुशासन सुनिश्चितताका निम्ति हाम्रो आन्दोलन, रोजगार, उत्पादन र समाजवादी शिक्षाका लागि २३औँ राष्ट्रिय सम्मेलन’ भन्ने मूल नाराका उक्त संगठनको २३औँ राष्ट्रिय सम्मेलन यहीँ असोज १०–१४ सम्म काठमाडौंमा हुँदैछ । सम्मेलनबाट नयाँ नेतृत्व छनोटका लागि निर्वाचन गर्नेपर्ने विद्यार्थी प्रतिनिधिहरूले जोड दिएका छन् । 

त्यसका लागि त्रिभुवन विश्वविद्यालयको स्मृति हलमा असोज १० गते हुनेछ । सम्मेलनमा देशभरबाट २३ सय २३ प्रतिनिधि सहभागी हुने संगठनकी अध्यक्ष पञ्चा सिंहले बताइन् । 

सिंहका अनुसार सम्मेलनले ३३ पदाधिकारीसहित २४३ सदस्यीय केन्द्रीय कमिटी चयन गर्नेछ । जसमा अध्यक्ष, ९ उपाध्यक्ष, महासचिव, ९ उपमहासचिव, १२ सचिव र कोषाध्यक्ष गरी ३३ जना पदाधिकारी रहनेछन् । 

संगठनमा हाल रहेका १९ उपाध्यक्ष र एकजना महासचिवसहित २० जनाले अध्यक्ष पदमा दाबी गर्ने तयारी गरेका छन् । वर्तमान उपाध्यक्षहरू पवन कार्की, मदन भुल, नरेश रेग्मी, इन्द्र भुसाल, जीपी मैनाली, तुकमान महरा, केशव रावल, नारायण खनाल तथा महासचिव दीपेश पुनलगायतका नेता अध्यक्षको आकांक्षी छन् ।

पार्टी उप–महासचिवद्वय वर्षमान पुन र जनार्दन शर्मा गुटबाट अध्यक्षका आकांक्षी धेरै देखिएका छन् । असोज १०–१४ सम्म काठमाडौंमा हुने उक्त संगठनको २३औँ राष्ट्रिय सम्मेलनमा दुई गुट हाबी हुने निश्चित छ । 

यद्यपि महासचिव देव गुरुङ र उपमहासचिव शक्तिबहादुर बस्नेत गुट नभएको होइन । तर, उक्त गुटबाट अध्यक्षका थोरै प्रत्यासी छन् । यसर्थ वर्षमान–जनार्दन गुट नै हाबी हुने पक्का छ । 

संगठनका महासचिव दिपेश पुन अध्यक्षका प्रत्यासी छन् । तर, उनीमाथि सुन तस्करी र सहकारी ठगीको आरोप छ । उनलाई उपहासचिव वर्षमान पुनले भरपूर साथ दिएका छन् । 

दिपेश अध्यक्षका लागि सक्षम भएपनि उनीमाथिको आरोपका कारण अध्यक्ष बनाउन नहुने विद्यार्थी नेताहरूको अडान छ । त्यस्तै इन्द्र भुसाल र केशव रावललाई वर्षमानकै साथ छ । 

त्यस्तै अर्का उपमहासचिव जनार्दन शर्मा गुटका मदन भूल, नारायण खनाल, क्षितिज सापकोटा, मदन भट्टराई हुन् । उनीहरूलाई जनार्दनले साथ दिएका छन् । नरेश रेग्मी भने महासचिव देव गुरुङ निकट मानिन्छन् । उपमहासचिव शक्ति बस्नेतले तुकमान महरालाई साथ दिने नेताहरूको भनाइ छ ।