काठमाडौं । बैतडीका लोकेन्द्र साउँद (२३) ले अनेक प्रयत्न गर्दा पनि जागिर पाएनन् । परिवारको आर्थिक अवस्था कमजोर थियो । अनि उनले विकल्प रोजे– वैदेशिक रोजगारीमा जाने । सोही क्रममा काठमाडौं आए । म्यानपावर र एजेन्टकहाँ धाउन थाले । 

उनको भेट एक्टिभ इम्प्लोई सर्भिस प्रालिका सञ्चालक सुरज गजुरेलसँग भयो । एक्टिभ मेनपावर कम्पनी होइन । यो कन्सलटेन्सी (परामर्शदाता) कम्पनी हो। साउँदलाई कन्सलटेन्सीले रोजगारीका लागि विदेश पठाउन पाउँदैन भन्ने थाहा थिएन । उनलाई जसरी हुन्छ, विदेश जानु थियो र पैसा कमाउनु थियो । 

गजुरेलले दुबईमा राम्रो आम्दानी हुने कामको अफर आएको सुनाएपछि साउँद जान तयार भए । त्यसका लागि भिजिट भिसामा जानुपर्ने गजुरेलको सर्त थियो । साउँदले स्वीकार गरे । गजुरेललाई तीन लाख ६० हजार रुपैयाँ बुझाए । 

गजुरेलसँग नियमित सम्पर्कमा रहेका साउँद जतिसक्दो छिटो विदेश उड्न चाहन्थे । तर एक वर्ष बित्दासमेत गजुरेलले दुबई पठाउने संकेत नदेखाएपछि साउँद तनावमा परे । उनी भन्छन्, ‘ऋण गरेर बुझाएको पैसा फसेको थियो । ब्याज बढिरहेको थियो । कामको टुंगो थिएन ।’ 

गजुरेलसँग पैसा उठाउन उनले अनेक प्रयत्न गरे । बल्लतल्ल भेटिएका गजुरेलले थप ढेड लाख रुपैयाँ दिए दुबई पठाउने प्रस्ताव गरे । साउँद भन्छन्, ‘त्यत्रो रकम फसिसकेको थियो । थप फसाउन चाहिनँ ।’ साउँदले दुबई जाने सपना देख्न छाडे । बरु फसेको रकम उठाउने ध्याउन्नमा थिए उनी । यसका लागि उनले प्रहरीको सहारा लिए ।

सिभिल ड्रेसका प्रहरीका साथमा उनी गजुरेललाई भेट्न पुगे । चाबहिलको केएल टावरमा बोलाएका गजुरेलले साउँदलाई सिभिल ड्रेसका प्रहरीकै अगाडि अपहरण गरे । उनलाई अपरहरण गरेर बोद्ध आरुबारी पुर्‍याइएको थियो ।

साउँद भन्छन्, ‘फिल्मी शैलीमा मलाई जबरजस्ती ट्याक्सीमा हाले । मानसिक यातना दिँदै आरुबारी लगे ।’ उनलाई त्यति बेला पैसा त गयो नै ज्यान पनि जाने भयो भन्ने चिन्ता थपियो । ‘प्रहरीले ती अपहरणकारीलाई पक्राउ गरेर मलाई उद्धार गर्‍यो’, साउँद भन्छन् । 

पक्राउ परेका सञ्चालक गजुरेल र उनका सहयोगीलाई फौजदारी अभियोगमा मुद्दा चलाउने तयारी भएको विभागका महानिर्देशक कुमारप्रसाद दाहालले बताए । एक्टिभ इम्प्लोई सर्भिस प्रालिका विषयमा अनुसन्धान गर्दा उक्त कम्पनी वैदेशिक रोजगार विभागमा दर्ता नभएको उनको भनाइ छ । 

गजुरेलले यसअघि पनि विदेश पठाइदिने प्रलोभनमा पैसा उठाएर दुई करोडभन्दा बढी रकम ठगेको दाहाल बताउँछन् । दाहाल भन्छन्, ‘केही युवालाई भिजिट भिसामा पठाएर उतै अलपत्र बनाएका रहेछन् ।’ उक्त कम्पनीमा प्रहरीले छापा मार्दा सयौंको संख्यामा राहदानी बरामद भएको विभागले जनाएको छ ।

महानिर्देशक दाहालका अनुसार एक्टिभ इम्प्लोई सर्भिस प्रालि कसल्टेन्सीका रूपमा खोलिएको संस्था हो । कन्सलटेन्सीले रोजगारीका लागि मान्छे विदेश पठाउन पाउँदैनन् । 

लकडाउनयता कन्सलटेन्सी नै यस्तो धन्दामा सक्रिय भएको दाहाल बताउँछन् । मंसिरयता विभागले ४२ वटा संस्थामा छापा मारेकोमा २९ वटा कन्सलटेन्सी मात्रै छन् । ती कन्सलटेन्सीबाट सयौंको राहदानी बरामद गरिएको छ ।

शैक्षिक परामर्श दिन खोलिएका कन्सलटेन्सी नै भिजिट भिसामा धमाधम मान्छे विदेश पठाउने र हजारौं युवालाई ठग्ने धन्दामा सक्रिय भएका छन् । यस्ता कन्सलटेन्सीमाथि निगरानी नबढाउने हो भने वैदेशिक रोजगारीमा नाममा थप ठगी धन्दा मौलाउनेछ ।