२०८२ कार्तिक २१ गते शुक्रवार
२०८२ कार्तिक २१ गते शुक्रवार
काठमाडौं । उपसभामुख इन्दिरा रानाले आफूसहित ६ जना अनधिकृत व्यक्तिलाई अमेरिका लैजान दूतावासलाई लेखेको पत्र विवाद सतहमा आएको छ । उनले गत वर्ष आफूसहित अनधिकृत व्यक्तिलाई अमेरिकामा आयोजित एक कार्यक्रममा लैजान नेपालस्थित अमेरिकी राजदूतलाई लेखेको पत्र विवाद सतहमा आएको हो ।
रानाले संसद्को गरिमामा आँच पुर्याउने कार्य गरेको भन्दै सत्तापक्षका सांसदहरूले संसद् बैठकमै विरोध जनाएका छन् । उनीहरूले उपसभामुखलाई मार्ग प्रशस्त गर्न समेत आग्रह गरेका छन् । त्यस्तै प्रमुख सत्तारूढ दल नेपाली कांग्रेसले पनि राजीनामा दिएर मार्ग प्रशस्त गर्न आग्रह गरेको छ । सत्तासाझेदार एमाले उपभामुख हटाएरै छाड्ने पक्षमा उभिएको छ ।
तथापि सत्तारूढ दल कांग्रेस ८८, एमाले ७७, जसपा ७, लोसपा र नागरिक उन्मुक्ति ४–४ र स्वतन्त्र १ गरी १८१ मत पुग्छ । दुईतिहाइका लागि आवश्यक १८३ मतमध्ये २ मत अपुग हुन्छ । किनकि एमालेका ७९ मध्ये दुई एक जना सभामुख (देवराज घिमिरे) छन् भने अर्का टोपबहादुर रायमाझी निलम्बित छन् । यसर्थ अहिले एमालेका ७७ जना सांसद मात्रै छन् ।
दुईतिहाइ जुटाउन प्रधानमन्त्रीसमेत रहेका केपी शर्मा ओली र कांग्रेस सभापति शेरबहादुर देउवा मधेस प्रदेश सरकारमा सहकार्य गरेको जनमत र सरकारलाई समर्थन जनाएको उपेन्द्र यादव नेतृत्वको जसपा नेपाललाई फकाउने कसरतमा छन् । जनमतका अध्यक्ष सीके राउतसँगको अनौपचारिक संवाद भएको छ ।
कांग्रेसले असोज ३ गतेसम्म आफ्ना सांसदलाई काठमाडौं उपत्यकाबाहिर नजान ह्वीप जारी गरेको छ । कांग्रेसका ५ सांसद देशबाहिर र ११ सांसद राजधानीबाहिर छन् । भदौ ३० भित्र सबैलाई काठमाडौं आइसक्न खबर गरिएको छ । तर, कांग्रेस संस्थापन पक्षले उपसभामुख रानालाई हटाउने पक्षमा आनाकानी गरिरहेको छ ।
© 2025 All right reserved to khabarcnter.com | Site By : Sobij
