२०८२ कार्तिक २० गते बिहिवार
२०८२ कार्तिक २० गते बिहिवार
काठमाडौं । सोमबार बसेको सत्तारूढ दलका शीर्ष नेताहरूको बैठकमा प्रधानमन्त्री केपी शर्मा ओलीले प्रतिपक्षी दलका नेता एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संसद्मा दिएको अभिव्यक्तिप्रति आपत्ति जनाएका छन् ।
उनले फेरी देशमा अस्थिरता र अराजकता निम्त्याउन खोजेको भन्दै प्रधानमन्त्री ओलीले उक्त बैठकमै आपत्ति जनाएका हुन् । उनले आफ्नो नेतृत्वको सरकार गठन भएयता अराजक गतिविधिलाई प्रचण्डले नै बढवा दिएको समेत बताएका थिए ।
काठमाडौं महानगरका मेयर बालेन शाह, अभियान्ता दुर्गा प्रसाईंलाई उक्साउने पनि प्रचण्ड भएको आरोप लगाएका थिए । बैठकमा सहभागी जनमत पार्टीका संसदीय दलका उपनेता अब्दुल खानले यो कुराको पुष्टि गर्दै भने, ‘बालेन, दुर्गा प्रसाईंलगायतको पछाडि पूर्वप्रधानमन्त्री पुष्पकमल दाहाल ‘प्रचण्ड’को हात रहेको कुरा उठेको हो । सदन र सामाजिक सञ्जालबाटै प्रतिवाद गर्ने कुरा पनि भएको छ ।’
यसका साथै बैठकमा प्रधानमन्त्री ओली स्वयंले बालेन र दुृर्गा प्रसाईंलाई उचाल्न प्रचण्ड नै उद्धत रहेको बताउँदै सरकारले त्यस्तो सूचना पाएको दाबी गरे । उनले भने, ‘सामाजिक सञ्जाल र सदनबाटै यसको प्रतिवाद हुन्छ र प्रतिवादका लागि प्रतिपक्षी सांसदहरूसँग सत्तारूढ दलका सबै सांसदहरू तयार रहन आग्रह गर्दछु ।’
प्रधानमन्त्रीको निर्देशनले नै संसद्को गतिरोध हुने निश्चित जस्तै छ । माओवादीले गरेको १० वर्षे सशस्त्र संघर्षलाई हिंसाको संज्ञा दिएपछि माओवादी केन्द्रका सांसदहरू संसद्मै प्रतिवादमा उत्रिएका थिए । १० वर्षे सशस्त्र संघर्षका सुप्रिमो प्रचण्डले नै यसको खण्डन गर्दै आएका छन् ।
यस्तोबेला प्रधानमन्त्री केपी शर्मा ओलीले संसद्लाई निरन्तर गति दिन सत्ता र प्रतिपक्षीलाई शान्त र संयम हुन आग्रह गर्नुको साटो उक्साउनु राम्रो नभएको राजनीतिक विश्लेषकहरू बताउँछन् ।
© 2025 All right reserved to khabarcnter.com | Site By : Sobij
