२०८२ कार्तिक २० गते बिहिवार
२०८२ कार्तिक २० गते बिहिवार
काठमाडौं । जनता समाजवादी पार्टी (जसपा) नेपाल पार्टी पुनर्निर्माणको तयारीमा जुटेको छ । उसले तल्लो तहदेखि आफ्ना सबै संगठनलाई सक्रिय एवं पुनर्निर्माण गर्न जुटेको हो ।
जसपाले ‘आधारभूत संगठन निर्माण अभियान’ नै सञ्चालन र त्यसको मोडालिटी कस्तो बनाउने भन्नेबारे बृहत् छलफल गर्ने भएको छ । त्यसका लागि उसले आज (आइतबार) बागमती प्रदेश अन्तर्गतका सबै जिल्लाहरू र काठमाडौंमा उपलब्ध केन्द्रीय अभियन्तालाई अभियानको उद्देश्य र लक्ष्यबारे प्रशिक्षण गर्ने गरी अध्यक्ष उपेन्द्र यादवले उक्त अभियानको उद्घाटन गर्दैछन् ।
काठमाडौंमा थापागाउँस्थित काठमाडौं ब्यांकेवेटमा मध्यान्ह १२ः३० बजे चार महिने अभियानको उद्घाटन भएसँगै पार्टीको आधारभूत संगठन निर्माण अभियान प्रारम्भ हुनेछ । त्यसका लागि सप्तरी, सिराहा, धनुषा, महोत्तरी र सर्लाही जिल्लाको लागि मधेस प्रदेशको जनकपुरमा भदौ १५ गते अभिमुखीकरण कार्यक्रम हुनेछ ।
त्यस्तै रौतहट, बारा, पर्सा र हेटौडासमेतका अभियन्ताका लागि भदौ १६ गते वीरगञ्जमा अभिमुखीकरण कार्यक्रम राखिएको छ । कोशी प्रदेशको विराटनगरमा भदौ १८ गते अभियन्ताहरूको अभिमुखीकरण कार्यक्रम आयोजना हुनेछ ।
त्यसैगरी लुम्बिनी प्रदेशका लागि भैरहवामा भदौ २३ गते र नेपालगञ्जमा भदौ २४ गते अभिमुखीकरण कार्यक्रम हुनेछ । भैरहवामा नवलपरासी, रुपन्देही, कपिलवस्तु, दाङका अभियन्ताका लागि र नेपालगञ्जमा बाँके, बर्दिया तथा कर्णाली प्रदेशका अभियन्ताहरूलाई अभिमुखीकरणमा सहभागी गराइनेछ । गण्डकी प्रदेशको पोखरामा र सुदूरपश्चिमको धनगढीमा भदौ २५ गते अभिमुखीकरण हुनेछ ।
अशोक राई नेतृत्वको समूह जसपा नेपालबाट विभाजन भएपछि अध्यक्ष उपेन्द्र यादवले तल्लो तहदेखि नै पार्टीको संगठन निर्माणमा सक्रिय देखिएका छन् ।
© 2025 All right reserved to khabarcnter.com | Site By : Sobij
