२०८२ कार्तिक २० गते बिहिवार
२०८२ कार्तिक २० गते बिहिवार
काठमाडौं । गत असार १७ मा एमाले–माओवादी सत्ता समीकरण भत्किएसँगै कांग्रेस–एमाले गठबन्धन बनेको छ ।
वाम–लोकतान्त्रिक गठबन्धन बनेसँगै छिमेकी मुलुक चीन अटेसमटेस भएको छ । चीनकै सक्रियतामा यसअघि एमाले–माओवादी सत्ता गठबन्धन बनेको चर्चा थियो ।
त्यसलाई पुष्टि गर्नेगरी यतिबेला चीनले पुनः नेपालका लागि चिनियाँ राजदूत छेन सोङमार्फत माओवादी नेताहरूसँग भेटघाट बाक्लो बनाएको छ भने माओवादी नेताहरू पनि गोप्य रूपमा चीन पुगेको स्रोत बताउँछ ।
स्रोतका अनुसार चीनमा उनीहरूले नेपालमा वाम गठबन्धन तथा ध्रुवीकरण गरिदिन आग्रह गरेका छन् । त्यसप्रति चीन पनि सकारात्मक भएको छ । उसले त्यसका लागि आन्तरिक गृहकार्य गरिरहेको छ ।
चीनले राजदूत लगायत अन्य आफ्ना नेतामार्फत एमाले–माओवादीका नेताहरूसँग आन्तरिक रूपमा घनिभूत छलफल चलाएको स्रोत बताउँछ । त्यस्तै आज राष्ट्रिय सभा अध्यक्ष नारायण दाहाल र नेपलका लागि चिनियाँ राजदूत छेन सोङबीच भेटवार्ता भएको छ । दाहाल माओवादी केन्द्रका अध्यक्ष प्रचण्डका भाइ हुन् भने उनी माओवादी पृष्ठभूमिका हुन् ।
आज (बुधबार) सिंहदरबारस्थित अध्यक्ष दाहालको कार्यकक्षमा भएको शिष्टाचार भेटवार्तामा उनीहरूबीच द्विपक्षीय साझेदारी, आपसी सहयोग र सम्बन्धका विषयमा कुराकानी भएको थियो । भेटमा अध्यक्ष दाहालले नेपाल र चीनबीचको सम्बन्ध वर्षौं पुरानो भएको चर्चा गर्दै दुई देशबीचको सम्बन्ध कूटनीतिक तहमा मात्रै नभई जनस्तरमा समेत बलियो र प्रगाढ रहेको बताए ।
चीनले नेपालको हितका लागि आर्थिक, सामाजिक क्षेत्रमा गरेको सहयोग अतुलनीय रहेको चर्चा गर्दै अध्यक्ष दाहालले आगामी दिनमा पनि सहयोग निरन्तर भइरहने विश्वास व्यक्त गरे ।
© 2025 All right reserved to khabarcnter.com | Site By : Sobij
