काठमाडौं । ०७६ जेठ १३ गते प्रतिनिधि सभा बैठकमा गृह मन्त्री रामबहादुर थापाले ‘बादल’ ले नेत्रविक्रम चन्द विप्लव नेतृत्वको नेकपाले चार कम्पनी जनसेना निर्माण गरेको खुलासा गरेका थिए । 

उनले बैठकमा भनेका थिए,“नेकपा विप्लव भन्ने समूहले जनसरकारको रुपमा जनपरिषद भन्ने संस्था उनीहरुले गठन गरेका छन् । जनसेनाको रुपमा उनीहरुले चार कम्पनी अहिले निर्माण गरेका छन् । र यी सबै गतिविधीहरुको नेतृत्व गर्नका लागि उनीहरुले नेकपा भन्ने नामको पार्टी पनि गठन गरेका छन् ।”

गृह मन्त्री थापाले केही वर्षदेखि यता उनीहरुले सशस्त्र गतिविधिहरु, गैर कानुनी गतिविधिहरु सञ्चालन गर्दै आइरहेको र उनीहरुको मुख्य निसाना उपत्यका भएको दाबी गरेका थिए । 

यसबीचमा ०७७ फागुन २१ मा सरकार र नेपाल कम्युनिष्ट पार्टी ९विप्लव० समूहबीच तीन बुँदे सहमति पत्रमा हस्ताक्षर भएको छ । 

सो समूह शान्ति प्रक्रियामा आएको छ । ०७५ फागुन २८ मा गृह मन्त्री थापाकै प्रस्तावमा विप्लव समूहमाथि प्रतिबन्ध लागेको थियो । अहिले प्रतिबन्ध फुकाएर वार्ता पनि थापाकै नेतृत्वमा भएको थियो । सरकारसँगको सहमतिपछि विप्लव सार्वजनिक भएका थिए ।

तीनबुँदे सहमतिमा प्रतिबन्ध खारेज, नेता–कार्यकर्ताको रिहाइ र उनीहरुमाथि लगाइएका मुद्दा खारेजी गर्ने उल्लेख छ । तर हिसांत्मक बाटोमा हिँडेको विप्लव समूहका हतियार र गृह मन्त्री आफैँले भनेका जनसेनाबारे सरकार मौन देखिएको छ । सुरक्षा निकायले पनि विप्लव समूहसँग सैन्य दस्ता र हतियार रहेको दाबी अझै गर्दै आएका छन् । 

वार्ताका क्रममा हतियार र सैन्य दस्ताको विषय नसमेटिएको भन्दै सुरक्षा निकाय असन्तृष्ट देखिन्छन् । सुरक्षा निकायहरुले पूर्वमाओवादी लडाकु र केही नयाँ युवासमेत मिलाएर सैन्य तालिम दिएको दाबी गर्दै आएका थिए । र अझै पनि विप्लबका ती जनसेना अभ्यामै रहेको श्रोतको भनाई छ। 

प्रहरीले ०७६  मंसिर १ गते दाङ र कपिलवस्तुको सीमावर्ती क्षेत्रबाट अत्याधुनिक हतियार बरामद गरेको थियो । कपिलवस्तुको शिवनगरबाट पाँच थान एसएमजी राइफल, म्यागजिन १३ थान र ३९० राउन्ड गोली बरामद भएका थिए ।

मोरङबाट समेत स्वचालित हतियारसहित विप्लव समूहका एकजना पक्राउ परेका थिए । 

विप्लव समूहसँग तत्कालीन माओवादी जनयुद्धकालीन समयमा लुकाएका एम–१६, एसएमजी, एके–४७ जस्ता अत्याधुनिक हतियार रहेको सुरक्षा निकायहरुको दाबी छ । 

यस्तै सुनसरीबाट विप्लव नेतृत्वको नेकपाकै एकजना नेता नेपाली सेनाले प्रयोग गर्दै आएको अत्यधुनिक हतियारसहित पक्राउ परेका थिए । 

पक्राउ पर्नेमा मोरङ केराबारी गाउँपालिका–१० बाहुनीका ४२ वर्षीय संगीत भनिने देवकुमार लिम्बू थिए । 

लिम्बूको साथबाट प्रहरीले एलएमजी र एम–१६ हतियार बरामद भएको थियो । एलएमजी हतियार नेपाली सेना, सशस्त्र प्रहरी र नेपाल प्रहरीको विशेष कार्यदलले प्रयोग गर्दै आएको छ भने एम–१६ नेपाली सेनाले मात्रै प्रयोग गर्ने गरेको छ ।

देशका विभिन्न स्थानबाट दर्जनौं साना ठूला हतियारसहित विप्लव समूहका नेता–कार्यकर्ता पक्राउ परेका थिए । केही संचार माध्यम लाई  विप्लव समूहले सैन्य अभ्यास गराउँदा हतियारबारे पढाइने नोट नै प्राप्त भएको थियो । 

हतियार र जनसेनाबारेको प्रसंग नै सहमतिमा उल्लेख नगर्दा विप्लव समूहबाट खतराको घण्टी बजिरहने एक सुरक्षा अधिकारीले  बताए ।