कुपन्डोलस्थित् एक घरको कोठाभित्र एक युवती मृत फेला परेकी छिन्। झुण्डिएको अवस्थामा सोमबार मृत फेला परेकी युवती सिन्धुलीको कमलामाई नगरपालिका–१ घर भएकी १९ वर्षीया दुर्गा पहाडी रहेकी प्रहरीले जनाएको छ। 

आफू बस्ने कोठाभित्रका दुवै ढोकामा भित्रबाट चुकुल लगाएको अवस्थामा ती युवती मृत फेला परेको महानगरीय प्रहरी प्रहरी परिसर ललितुरका एसएसपी किरण बज्राचार्यले जानकारी दिइन्। युवती मृत रहेको भन्ने जानकारी आएपछि प्रहरी टोली सोमबार दिउँसो ११ बजे घटनास्थल पुगेको थियो। भित्रबाट ढोका लगाएको अवस्थामा मृत रहेको देखिएपछि ढोका फोडेर प्रहरीले मुचुल्का उठाइएर शव उठाएको थियो।

प्रहरीको प्रारम्भिक अनुसन्धानमा ती किशोरीले आत्महत्या गरेको हुनसक्ने अनुमान छ। तर, युवतीको परिवारले भने आत्महत्या नभइ हत्या हुनसक्ने भन्दै शव बुझ्न मानेका छैनन्। युवतीका आफन्त अहिले पनि ललितपुर परिसरमा जाहेरी दिने तयारी छन्।

मृत युवतीकी दिदी कमला पहाडी भन्छिन्–डाक्टरलाई छानबिनको दायरामा ल्याउनु पर्‍यो  
अहिले म महानगरीय प्रहरी परिसर ललितपुरमा छु। प्रहरीले घटनास्थलको भिडियो, फोटो हामीलाई देखाइरहेको छ। मुचुल्काको विवरण सुनाइरहेको छ। तर, हामीलाई यो आत्महत्या भनइ हत्या हो भन्ने शंका लागेको छ।

सोमबार दिउँसो ११ बजे मलाई खबर आएको थियो। गोठाटारबाट यहाँ आइपुग्दा १ बज्यो। म पुग्दा प्रहरी भित्र छिरी मुचुल्का उठाइरहेको थियो। बहिनी झुण्डिएको छ तर, भुँईमा खुट्टा टेकेको छ। मुडा भुँईमा लडको छ। दुईतिर बेड छ। आफैं झुण्डिएको भन्न सक्ने अवस्था छैन। बहिनी कहिले मरेको थाहा छैन। पहेँलो डोरीले फ्यान राख्न राखिएको रडमा झुण्डिएको थियो। बहिनी मसँगबाट अलग भएर बसेको ३ वर्ष भयो। गत चैत १० गतेबाट कुपन्डोलमा कोठा लिएर बस्न थालेकी थिइ।

प्रहरीले अनुसन्धान गर्दैछौं, पुरै भिडियो खिचेका छौं। पहिला शव बुझ्नुहोस् त्यसपछि पोष्टमार्टम गरौं। पोष्टमार्टम रिपोर्टमा आत्महत्या देखिएन भने जाहेरी लिएर अनुसन्धान गछौंं भनेको छ। तर, हामी अहिले शव बुझ्ने अवस्थमा छैनौं। हामीलाई डाक्टरमाथि शंका छ। डाक्टरलाई अनुसन्धानको दायरमा ल्याउनु पर्‍यो अनि शव बुझ्छौं भन्ने हाम्रो माग हो।

गत चैतदेखि डेन्टलमा काम गर्थी। तर, कुन डेन्टलमा काम गर्थी कहिल्यै बहिनीले हामीलाई भनिन। त्यही भएर हामीलाई डाक्टरमाथि शंका छ। दुईवटै मोबाइलमा फेसलक राखेको रहेछ। खुल्न सकेको छैन। बहिनीले डाक्टरको नाम र डेन्टलको नाम कहिल्यै भनिन। फोन गर्दागर्दै डाक्टर आयो गाली गर्छ राखे है भन्थी।

महिनाको १० हजार तलब हुन्छ भन्थी। कोठा भाडा तिरेर, रासन-पानी खाएर, लगाएर ४५ हजारको बेड र ८० हजारको मोबाइल कसरी किनियो रु यो पाटो प्रहरीले अनुसन्धान गर्नुपर्छ।