२०८२ माघ १५ गते बिहिवार
२०८२ माघ १५ गते बिहिवार
नेपाल कम्युनिष्ट पार्टी (एमाले)को एकता जोगाउन सांसदहरू सक्रिय भएका छन् । एमाले सांसदहरूले आज दिउँसो १ बजे सिंहदरबारस्थित संसद् सचिवालयमा विघटित कार्यदलका सदस्यहरूलाई बोलाएर छलफल गर्न लागेका हुन् ।
‘१० बुँदे सहमतिमा कार्यदलका सबै सदस्यको एक मत हो भने त्यहीअनुसार अघि बढ्नुपर्यो । होइन भने नयाँ विकल्प ल्याएर भए पनि पार्टी एकता जोगाउनु पर्यो । त्यसकै लागि विघटित कार्यदलका सदस्यहरूसँग छलफल गर्न लागेका हौँ,’ ओली पक्षका सांसद कृष्णप्रसाद दाहालले भने ।
पार्टी एकताका लागि विघटित कार्यदलका सदस्यहरूमार्फत दबाब दिनका लागि आज छलफलका लागि बोलाइएको उनले बताए ।
बैठकमा एमालेका सबै सांसदहरूलाई आमन्त्रण गरिएको छ । ‘सांसदका कुराहरू पनि विघटित कार्यदलका सदस्यहरूलाई सुनाउँछौँ । उहाँहरूका कुरा पनि सुन्छौं,’ दाहालले भने ।
पार्टीभित्रको विवाद समाधानका लागि दोस्रो तहका नेताहरू निरन्तर प्रयास गरिरहेका छन् । उनीहरूलाई नै थप दबाब र सल्लाह दिनका लागि सांसदहरूले बैठक बोलाएको बताएका छन् ।
एमालेको विघटित कार्यदलमा माधव नेपाल पक्षबाट भीम रावल, घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त छन् भने ओली पक्षबाट सुवास नेम्वाङ, विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् ।
दोस्रो तहका यी नेताहरूले पार्टी विवाद समाधानका लागि निरन्तर पार्टी अध्यक्ष ओली र वरिष्ठ नेता माधव नेपालसँग संवाद गरिरहेका छन् । तर, उक्त संवादको सार्थक निष्कर्ष भने अझै आउन सकेको छैन ।
© 2026 All right reserved to khabarcnter.com | Site By : Sobij
