२०८२ माघ १५ गते बिहिवार
२०८२ माघ १५ गते बिहिवार
नेकपा एमाले अध्यक्ष केपी शर्मा ओलीले वरिष्ठ नेता माधव नेपाल समूहलाई आममाफी दिने भनेर गरेको घोषणामा माधव नेपालले जवाफी टिप्पणी गरेका छन् ।
४३ औं पुष्पलाल स्मृति दिवसको अवसरमा ललितपुरको च्यासलस्थित तुलसीलाल स्मृति प्रतिष्ठानमा पुष्पलाल मित्रता केन्द्रले आयोजना गरेको नेपाली कम्युनिष्ट आन्दोलनको अबको बाटो विषयक प्रवचन कार्यक्रमलाई सम्बोधन गर्दै नेपालले भने, ‘महामहिम श्री ५ महाराजधिराजबाट महावाणी आयो । एमनेष्टी इज ग्रान्टेड । महाराजधिराज उवाच ।’
उनले थप भने, ‘स्पष्टीकरण लिएको गल्ती भयो । फिर्ता लिएका छौं भनेको भए के हुन्थ्यो । उचाइ घट्थ्यो ? आज सुध्रेलान कि भन्यो उस्तै छ, भोलि पनि उस्तै छ ।’
आफूले भने पार्टी एकतामा असर पर्ला भनेर ध्यान दिएको तर, ओलीले आफूलाई महाराजधिराज नै ठानेको बताए ।
‘म भने पार्टी एकतामा असर पर्ला भनेर हरेक शब्द शब्दमा ध्यान दिएर बोलेको छु । कतै चिप्लिहाल्ला कि भन्नेमा कत्रो ध्यान दिएर बोलेको छु । साथीहरूको दबाब पनि उस्तै छ,’ उनले भने, ‘हिजो म भक्तपुर गएको थिएँ । एक हजार सदस्य भएको पिपुल्स भोलेन्टियर घोषणा गरे र भने माधव नेपालको घर वरिपरि गएर बाँदर जुलुस निकाल्ने बाँदरे प्रवृत्ति चाहिँ नदेखाउनू ।’
ओली पक्षीय युवाहरूले निकालेको जुलुसतर्फ संकेत गर्दै नेपालले भने, ‘यसो बाहिर निस्किएको त मोटरसाइलमा उफरखुट्टी लगाएर बसेका, माधव नेपाललाई तर्साउन आएका । माधव नेपाल तर्सिने मान्छे होइन । हामी विशेष धातुले बनेका मान्छौ हौं ।’
© 2026 All right reserved to khabarcnter.com | Site By : Sobij
