२०८२ माघ १५ गते बिहिवार
२०८२ माघ १५ गते बिहिवार
काठमाडौं । प्रधानमन्त्री शेरबहादुर देउवाको विश्वासको पक्षमा मत दिएका नेकपा (एमाले)का सांसदलाई सोधिएको २४ घण्टे स्पष्टीकरणको समय आज सकिँदै छ ।
वरिष्ठ नेता झलनाथ खनाल–माधवकुमार नेपाल र अध्यक्ष केपी शर्मा ओलीको पक्षमा रहँदै आएका २२ सांसदलाई बुधबार स्पष्टीकरण सोधिएको थियो । खनाल–नेपाल समूहले स्पष्टीकरण सोधिनुलाई पार्टी एकतामा भाँजो हाल्ने कामको संज्ञा दिएको छ ।
बुधबार बसेको नेपालनिकट स्थायी कमिटी सदस्यहरुको बैठकपछि नेता रघुजी पन्तले स्पष्टीकरण सोधेर पार्टी एकतामा भाँजो हाल्न खोजिएको बताएका थिए ।
स्पष्टीकरण सोधिए पनि तत्काल कारबार्ही गर्ने तयारी भने गरिएको छैन । हिजोको केन्द्रीय कमिटी बैठकमा पार्टी अध्यक्ष केपी शर्मा ओलीले पार्टी एकताका लागि अधिकतम लचिलो बन्न तयार भएको बताएका थिए । उनले नेता नेपाललाई आफू दोस्रो अध्यक्ष दिन तयार भएको ‘ब्रिफिङ’ बैठकमा गरेका थिए ।
जारी केन्द्रीय कमिटी बैठकमा स्पष्टीकरण सोधिएका सांसदलाई कारबाही गर्ने तयारी नभएको एक केन्द्रीय सदस्य बताउँछन् । “पार्टीले विश्वासको मतमा भोट नहाल्नु भनेको छ । पक्षमा मत हालेपछि स्पष्टीकरण त सोध्दै पर्यो नि । तर, पार्टी मिलाउने प्रयास जारी छ । हदैसम्म मिलाउन तयारी गर्ने हो । कारबाही गर्ने कुरा अहिले छैन, ती नेताले भने, “अब केही दिनमा मिल्यो भने मिलिहाल्यो, नभए पार्टी एकताको सम्भावना कम छ ।”
यही साउन ३ गते प्रतिनिधिसभामा विश्वासको मतको पक्षमा एमालेका २२ सांसदले मतदान गरेका थिए । केन्द्रीय कमिटीको ४ गते बसेको बैठकले स्पष्टीकरण सोध्ने निर्णय गरेको थियो । जारी केन्द्रीय कमिटी बैठक आज सकिने बताइएको छ ।
© 2026 All right reserved to khabarcnter.com | Site By : Sobij
