२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौं । खोज तथा उद्धारको लागी चिलिमे जलविद्युत आयोजनाको सुरुङको मुख नजिकसम्म सडक पुर्याइएको छ ।
रसुवाको स्याफ्रबेँशी हुँदै चिलिमेको टनेलसम्म हेभी उपकरण लैजान नेपाली सेनाले पहुँच सडक निर्माण गरेको हो । सुरुङको मुखबाट करिब ३० मिटर नजिकसम्म पहुँचमार्ग बनाइएको छ । सैनिक प्रवक्ता राजाराम बस्नेतले भने, ‘पहुँचमार्ग टनेल नजिकैसम्म पुगेको छ ।’
सेनाले प्रयोग गर्दै आएको एमआई–१७ हेलिकप्टरबाट ठुला उपकरण लगेर चिलिमेको सुरुङको मुखमा ल्याण्ड गरेर त्यहाँ फसेकाहरूको खोजी गर्न असम्भव भएसँगै सेनाले सडक बनाएर ठुलो उपकरण लैजान लागेको हो ।
२२ मेगावाटको चिलिमे जलविद्युत आयोजना क्षेत्रमा रहेका सांसद सागर ढकालका अनुसार पहुँच सडक बनाउन एउटा एक्स्काभेटर प्रयोग गरिएको छ । चिलिमेको टनेलभित्र ८ जना मानिस फसेका छन् । खोज तथा उद्धारका लागी नेपाली सेना र भारतीय टनेल विशेषज्ञहरूले काम गरिरहेका छन् ।
हेभि उपकरण लैजान नसकेपनि उद्धारकर्मीहरू टनेलको ११५ मिटर भित्र पुगेर डेब्रिज हटाउने काम गरिरहेका छन् । सुरुङ भित्र उकालो र ओरोलो ‘बेन्ड’ क्षेत्रमा उद्धारकर्मीहरू पुगेका हुन् । त्यहाँ विस्फोट गर्न नमिल्ने भएपछि ठुला उपकरण लैजान खोजिएको सैनिक प्रवक्ता राजाराम बस्नेतले जानकारी दिए ।
उद्धारकर्मीहरुले ६ मिटरका ठुला पाइप प्रयोग गरेर हिँड्न मिल्ने बाटो तयार गरेका छन् । विस्फोट गरेर ठुला ढुङ्गा फुटाउनुपर्ने भएपछि पहुँचमार्ग बनाउन समय लागेको बताइएको छ ।
सांसद ढकालका अनुसार पुल्चोक क्याम्पसबाट लेदो तान्ने मेशिन चिलिमेमा लगिएको छ। पूर्वउर्जामन्त्री कुलमान घिसिङले पनि चिलिमे जलविद्युत आयोजना स्थलमा पुगेर सहजीकरण गरेका छन् ।
© 2026 All right reserved to khabarcnter.com | Site By : Sobij
