२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौं । भोटेकोशी बाढीका क्रममा रसुवा र नुवाकोट जिल्लाबाट संकलित १ सय ६१ शव काठमाडौं आइपुगेको छ । तर, शव दावी गर्न आएकामध्ये २३ वटा शवमात्र पहिचान भई आफन्तले लगेका छन् ।
पहिचान हुन नसकेका शवहरुको ‘व्यवस्थापन संरक्षण’ गर्ने तयारी भइरहेको काठमाडौँ प्रहरी प्रवक्ता एसपी दानबहादुर थापाले बताए । त्यसका लागि पोष्टमार्टम र डीएनए स्याम्पल तयार पार्ने काम आइतबारदेखि नै थालिएको थियो । आज विहान १० बजेसम्ममा ५० वटा शव व्यवस्थापनका लागि तयार भएको छ । बाँकी शवहरु पनि दिनभरिमा पोष्टमार्टम गरी डीएनए स्याम्पल राखेपछि व्यवस्थापन गरिने एसपी थापाले बताए ।
काठमाडौँ ल्याइएका शवहरु त्रिवि शिक्षण अस्पताल, महाराजगञ्जमा राखिएका छन् । त्यहाँ शव दावी गर्न आउनेको घुइँचो छ । दावीकर्तालाई शव हेर्न दिने र आफन्तको हो भन्ने प्रमाणित भएपछि जिम्मा दिने काम पनि सँगसँगै भइरहेको थापाले बताए ।
यसअघि काठमाडौं ल्याइएका ८५ वटा शवलाई आईसीआरसी प्रोटोकलअनुसार व्यवस्थापन संरक्षण गरिएको थियो । भदौ १६ गते गोकर्णेश्वर नगरपालिका–७ दक्षिणढोकास्थित नेपाल ट्रष्ट स्वामित्वको वन क्षेत्रमा ती शवलाई सुरक्षित तवरले व्यवस्थापन गरिएको थियो । शवहरुको डीएनए स्याम्पल भएका कारण कसैले तीमध्ये शव आफन्त भनी दावी गरेमा आफन्त दावी गर्नेको पनि डीएनए स्याम्पल लिइन्छ ।
दुबैको स्याम्पल म्याच भएमा शव उत्खनन गरेर दिने व्यवस्था रहेको एसपी थापाले बताए । व्यवस्थापन गरिएका शवहरु नगल्ने गरी राखिएको उनले बताए । थप शव पनि सोही वन क्षेत्रमा व्यवस्थापन गर्ने तयारी छ ।
© 2026 All right reserved to khabarcnter.com | Site By : Sobij
