३४ देशका ५९० विदेशी नागरिक अझै बेपत्ता

भाद्र १८, २०८३ बिहिवार

617

काठमाडौं । भोटेकोशी बाढीपछि ३४ देशका ५९० विदेशी नागरिक अझै बेपत्ता सूचीमा रहेको परराष्ट्र मन्त्रालयले जनाएको छ ।

बिहीबार मन्त्रालयमा आयोजित नियमित प्रेस ब्रिफिङमा प्रवक्ता लोकबहादुर पौडेल क्षेत्रीले हालसम्म ३०० भन्दा बढी विदेशी नागरिकको उद्धार गरिएको जानकारी दिँदै अझै ३४ देशका ५९० विदेशी नागरिक बेपत्ता रहेको बताए ।

उनका अनुसार रसुवाको टिमुरेदेखि नुवाकोट, धादिङ, चितवन तथा नवलपरासी पूर्व र पश्चिमसम्म ९ हजार ३ सयभन्दा बढी नेपाली सेनाका जनशक्ति उद्धार तथा खोजी कार्यमा परिचालित छन् ।

भारतीय टनेल उद्धार टोली नेपाली सेनासँग समन्वय गरी आवश्यक उपकरणसहित परिचालित रहेको र चिलिमेतर्फ थप एक्स्काभेटर पठाउने तयारी भइरहेको मन्त्रालयले जनाएको छ ।

त्यस्तै, लाङटाङतर्फ सेना र प्राविधिक टोलीले मेसिन प्रयोग गरी सुरुङको अपस्ट्रिम भागमा सानो प्वाल खोल्न सफल भएको प्रवक्ता पौडेलले बताए । माथिल्लो त्रिशूली–३ ‘ए’ मा चिनियाँ टनेल टोली र नेपाली सेनासहित ९३ सदस्यीय संयुक्त टोली थप जनशक्ति तथा उपकरणसहित खोज तथा उद्धारमा खटिएको छ ।

बाढीमा ज्यान गुमाएकाहरूको शव पहिचानका लागि भारतबाट १९ सदस्यीय र चीनबाट ५ सदस्यीय विशेष फोरेन्सिक टोली नेपालमा कार्यरत रहेको पनि मन्त्रालयले जानकारी दिएको छ ।

विपद्पछि भारत, चीन, अमेरिका, बेलायत, जापान, दक्षिण कोरिया, अस्ट्रेलिया, युरोपेली युनियन, विश्व बैंक, एसियाली विकास बैंकलगायत दर्जनौँ मित्रराष्ट्र तथा दातृ निकायले ऐक्यबद्धता र सहयोग जनाएका छन् ।

यसैबीच, केरुङबाट १४० जना नेपाली तातोपानी नाका हुँदै नेपाल फर्कने क्रममा रहेको मन्त्रालयले जनाएको छ । चिनियाँ सीमा क्षेत्रतर्फ अझै करिब १०० नेपाली बेपत्ता रहेको प्रवक्ता पौडेलले जानकारी दिए ।

प्रकाशित मिति :भाद्र १८ २०८३ बिहिवार - १६:०२:४३ बजे

प्रतिक्रिया