२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौं । संयुक्त राज्य अमेरिकाको विदेश मन्त्रालयले नेपालको रसुवा जिल्लामा आएको विनाशकारी आकस्मिक बाढीका कारण भएको धनजनको क्षतिप्रति गहिरो दुःख व्यक्त गरेको छ ।
मन्त्रालयको प्रवक्ताको कार्यालयद्वारा जारी विज्ञप्तिमा बाढीमा परी ज्यान गुमाउनेका परिवार र आफन्तजनप्रति समवेदना प्रकट गर्दै अमेरिका यस विपद्को घडीमा नेपालको साथमा रहेको जनाइएको छ।
अमेरिकी सरकारले बाढी प्रभावित समुदायको तत्काल सहयोगका लागि ५ लाख अमेरिकी डलर (करिब ६ करोड ६० लाख रुपैयाँभन्दा बढी) उपलब्ध गराउने घोषणा गरेको छ । यो रकम ‘क्याथोलिक रिलिफ सर्भिसेज’ मार्फत आपत्कालीन आवास, राहत सामग्री, खानेपानी, सरसफाइ र स्वच्छतासम्बन्धी सहायताका लागि खर्च गरिनेछ ।
साथै, अमेरिकी विदेश मन्त्रालयले बाढीपछिको अवस्थाको अनुगमन गर्न र राहत तथा पुनर्स्थापनाका प्रयासमा सहयोग पुऱ्याउन एक ‘विपद् प्रतिकार्य सल्लाहकार’ लाई समेत सो क्षेत्रमा खटाउने जानकारी दिएको छ ।
काठमाडौंस्थित अमेरिकी दूतावासले बाढी प्रभावित क्षेत्रमा रहेका आफ्ना नागरिकहरूको सुरक्षाको विषयमा स्थानीय अधिकारीहरूसँग निकट समन्वय गरिरहेको जनाएको छ ।
आपत्कालीन सहयोग आवश्यक पर्ने अमेरिकी नागरिकहरूलाई दूतावासको इमेल वा तोकिएका हटलाइन नम्बरहरूमा सम्पर्क गर्न आग्रह गरिएको छ ।
दूतावासले सो क्षेत्रमा रहेका अमेरिकी नागरिकहरूलाई स्थानीय समाचारहरू नजिकबाट नियाल्न, स्थानीय अधिकारीहरूका निर्देशनहरू पालना गर्न र आपत्कालीन सूचनाका लागि ‘स्मार्ट ट्राभलर इनरोलमेन्ट प्रोग्राम’ मा आबद्ध हुन समेत सुझाव दिएको छ ।
© 2026 All right reserved to khabarcnter.com | Site By : Sobij
