२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौँ। आफ्ना १५ जना बिरामीको हत्या गरेको अभियोगमा जर्मनीका एक प्यालिएटिभ केयर डाक्टरलाई आजीवन कारावासको सजाय सुनाइएको छ।
बर्लिनको एक अदालतले जर्मनीको गोपनीयता नियम अनुसार ‘जोहानेस एम’ नाम मात्र सार्वजनिक गरिएका ४१ वर्षीय ती डाक्टरलाई दोषी ठहर गरेको हो। उनले सन् २०२१ सेप्टेम्बरदेखि सन् २०२४ जुलाईको बिचमा १२ जना महिला र ३ जना पुरुषको हत्या गरेका थिए।
अधिकारीहरूका अनुसार यो घटना त केवल सुरुवात मात्र हुन सक्छ। अभियोजकहरूले अहिले ती डाक्टर जोडिएका अन्य दर्जनौँ घटनाहरूको अनुसन्धान गरिरहेका छन्। उनका सिकार भएका व्यक्तिहरू २५ देखि ९४ वर्ष उमेर समूहका थिए। अदालतमा सुनुवाइको क्रममा उनीहरू सबै जना गम्भीर बिरामी भए तापनि कसैको पनि तत्कालै मृत्यु हुने अवस्था नरहेको बताइएको छ।
डाक्टरले बिरामीको घरैमा पुगेर उनीहरूको मन्जुरी विना नै विभिन्न औषधिहरूको घातक मिश्रण दिने गरेको अभियोजकहरूले बताए। कतिपय अवस्थामा उनले आफ्नो अपराध लुकाउन बिरामीको घरमा आगो समेत लगाउने गरेका थिए।
सन् २०२४ जुलाईमा पक्राउ पर्नु केही समयअघि मात्र ती डाक्टरले एकै दिनमा दुई जना बिरामीको ज्यान लिएका थिए। उनले सुरुमा मध्य बर्लिनस्थित घरैमा ७५ वर्षीय एक वृद्धको हत्या गरे र त्यसको केही घण्टापछि छिमेकी जिल्लामा ७६ वर्षीया वृद्धाको ज्यान लिए। उनले ती वृद्धाको घरमा आगो लगाउने प्रयास गरे पनि सफल हुन सकेनन्।
प्रहरीले उनले अन्य बिरामीको पनि हत्या गरेको आशङ्का गर्दै थप ७६ वटा घटनामा अनुसन्धान गरिरहेको छ। जर्मन सञ्चारमाध्यमहरूका अनुसार यदि ती थप घटनाहरू प्रमाणित भएमा यो जर्मनीको इतिहासकै सबैभन्दा ठुलो शृङ्खलाबद्ध हत्याको घटना बन्नेछ।
यसअघि अदालतमा पीडितका आफन्तहरूले अझै पनि यस कुरालाई विश्वास गर्न नसकिरहेको बताएका थिए। सन् २०२१ मा ज्यान गुमाएकी सबैभन्दा कान्छी २५ वर्षीया युवतीकी आमाले आँसु बगाउँदै भनिन्, ‘उनले आफू अब बाँच्न चाहन्नँ भनेर कहिल्यै भनेकी थिइनन्।’ त्यस्तै सन् २०२४ मा ज्यान गुमाएकी ७२ वर्षीया वृद्धाका छोराले आफ्नी आमा बहिनीसँग बाल्टिक सागर घुम्न जाने योजनामा रहेको बताउँदै भने, ‘मेरी आमा अझै बाँच्न चाहन्थिन्।’
अदालतले डाक्टरको अपराधलाई अत्यन्तै गम्भीर ठहर गर्दै कारावासको सजायपछि पनि उनलाई नियन्त्रणमै राख्न आदेश दिएको छ। अदालतले उनलाई चिकित्सा पेसा अङ्गाल्न नपाउने गरी आजीवन प्रतिबन्ध समेत लगाएको छ।
© 2026 All right reserved to khabarcnter.com | Site By : Sobij
