२०८३ आश्विन २ गते शुक्रवार
२०८३ आश्विन २ गते शुक्रवार
.gif)
काठमाडौं । असार १३ गते प्रहरीको नियन्त्रणमा रहेका विराटनगरका अभिषेक गिरीविरुद्ध प्रहरीले थप दुई वटा मुद्दामा अनुसन्धान अघि बढाएको छ । गिरीलाई सङ्गठित अपराध र सम्पत्ति शुद्धीकरण मुद्दामा म्याद थप गर्न सोमबार जिल्ला अदालत मोरङमा उपस्थित गराएको हो ।
यसअघि आपराधिक लाभ मुद्दामा पक्राउ परेका गिरीको म्याद सोमबार सकिँदै थियो । गिरीको अपराधको जालो ठुलो रहेको र अवैध माध्यमबाट धन आर्जन गरेको देखिएकाले थप दुई गम्भीर मुद्दामा अनुसन्धान गर्नुपर्ने प्रहरीको दाबी छ ।
मोरङका प्रहरी प्रमुख उपरीक्षक (एसपी) कविता कटुवालका अनुसार गिरीको गतिविधि सङ्गठित स्वरूपको देखिएको र उनले अस्वाभाविक सम्पत्ति आर्जन गरेको पाइएकाले यी मुद्दामा म्याद थपको प्रक्रिया अघि बढाइएको हो ।
अहिले मोरङ अदालतमा उनलाई म्याद थपको लागि प्रहरीले उपस्थित गराएको छ । मोरङ अदालतका स्रेस्तादार मणि पोखरेलले मोरङ प्रहरीले दुई मुद्दामा म्याद थप गर्न ल्याएकोले अहिले इजालास पेस गरिएको बताएका छन् ।
गिरीलाई गत असार १३ गते बिहान विराटनगर-८, मधुमारास्थित उनकै निवासबाट प्रहरीले नियन्त्रणमा लिएको थियो । गिरीसँगै उनका सहयोगीहरू सञ्जय मण्डल र विजय कामतसहित चार जनालाई प्रहरीले यसअघि नै पक्राउ गरिसकेको छ । कारागारभित्र रहेका कैदी बन्दीको रासन भत्ता र पारिश्रमिकमा आर्थिक शोषण गरेको उजुरी परेपछि उनीमाथि प्रहरीले निगरानी बढाएको थियो ।
© 2026 All right reserved to khabarcnter.com | Site By : Sobij
