२०८३ आश्विन १ गते बिहिवार
२०८३ आश्विन १ गते बिहिवार
.gif)
काठमाडौं । सर्वोच्च अदालतकी वरिष्ठतम न्यायाधीश सपना मल्ल प्रधानले २० दिन बिदा मागेकी छन् । आफूभन्दा जुनियर न्यायाधीश सर्वोच्चको प्रधानन्यायाधीशमा नियुक्त भएपछि मल्ल असन्तुष्ट थिइन्।
मंगलबार मात्रै मनोशकुमार शर्मा सर्वोच्चको प्रधानन्यायाधीशमा नियुक्त भएका थिए। त्यसको भोलिपल्टै मल्ल २० दिन लामो बिदामा बसेकी हुन्। शर्मा प्रधानन्यायाधीश नियुक्त हुनुअघि उनी आफैँले कायममुकायम प्रधानन्यायाधीशको रूपमा बिदा स्वीकृत गरेकी हुन्।
सर्वाेच्चका न्यायाधीश बिदामा बस्नका लागि प्रधानन्यायाधीशसमक्ष स्वीकृतिका लागि पेस हुने गर्छ। शर्माले प्रधानन्यायाधीशको रूपमा पदभार ग्रहण गर्नुपूर्व नै मल्लले आफ्नो बिदा आफैँले स्वीकृत गरेको सर्वोच्चका प्रवक्ता अर्जुनप्रसाद कोइरालाले जानकारी दिए।
यसअघि मल्ल सर्वोच्चको न्यायाधीश वरीयतामा पहिलो रोलक्रममा थिइन्। मल्ल पछिको दोस्रो रोलक्रममा न्यायाधीश कुमार रेग्मी र तेस्रोमा हरिप्रसाद फुँयाल थिए।
उनीहरू सबैलाई पन्छाएर प्रधानमन्त्री बालेन्द्र शाहकाे इन्ट्रेस्टमा चौथो नम्बरमा रहेका शर्मालाई संवैधानिक परिषदले प्रधानन्यायाधीशमा सिफारिस गरेको हो।
शर्माले मंगलबारै राष्ट्रपति रामचन्द्र पौडेलसमक्ष शपथ लिएका छन्। शर्मालाई स्वागत गर्न पनि मल्ल हिजो सर्वोच्चमा उपस्थित भएकी थिइनन्।
यसअघिका प्रधानन्यायाधीश प्रकाशमानसिंह राउत ६५ वर्षे उमेरहदको कारण अवकाश भएपछि बरिष्ठतम न्यायाधीश मल्लले २०८२ चैत १८ गतेदेखि कामु प्रधानन्यायाधीशको जिम्मेवारी सम्हाल्दै आएकी थिइन्।
© 2026 All right reserved to khabarcnter.com | Site By : Sobij
