२०८३ बैशाख २९ गते मंगलवार
२०८३ बैशाख २९ गते मंगलवार
काठमाडौं । युक्रेन–रुस युद्ध लम्बिँदै जाँदा दुवै पक्षका सैनिकहरू गम्भीर खाद्य संकटसँग जुधिरहेको रिपोर्ट सार्वजनिक भएको छ।
अल जजिराको रिपोर्टअनुसार, युद्धको अग्रपंक्तिमा रहेका युक्रेनी सैनिकहरूको कमजोर र कुपोषित अवस्थाका तस्वीरहरू सार्वजनिक भएपछि युद्धको मानवीय संकटबारे नयाँ बहस सुरु भएको छ।
रिपोर्टमा सार्वजनिक तस्वीरहरूमा केही युक्रेनी सैनिक अत्यन्त दुब्लाएका र थकित देखिन्छन्। लामो समयदेखि पर्याप्त खाना, औषधि र आधारभूत सामग्रीको अभावले उनीहरूको शारीरिक अवस्था कमजोर बनेको बताइएको छ।
युद्धक्षेत्रमा निरन्तर आक्रमण, आपूर्ति मार्गमा अवरोध र कठोर मौसमका कारण खाद्यान्न पुर्याउन कठिन भइरहेको जनाइएको छ।
अल जजिराका अनुसार, समस्या केवल युक्रेनी पक्षमा सीमित छैन। रुसी सैनिकहरूले पनि न्यून र कमजोर गुणस्तरको राशन पाएको गुनासो गरिरहेका छन्।
कतिपय क्षेत्रमा सैनिकहरूलाई पुरानो वा अपर्याप्त खाना उपलब्ध गराइएको र आवश्यक पोषण नपुग्दा मनोबलसमेत प्रभावित भएको रिपोर्टमा उल्लेख छ।
युद्ध लम्बिँदै जाँदा दुवै देशको सैन्य आपूर्ति प्रणाली दबाबमा परेको छ। हतियार र सैन्य रणनीतिसँगै अहिले खाद्य आपूर्ति र आधारभूत जीवनयापन पनि युद्धको महत्वपूर्ण मोर्चा बनेको छ।
रिपोर्टले युद्ध केवल भूभागको लडाइँ नभई मानव अस्तित्वको संकटमा परिणत हुँदै गएको देखाएको छ। अग्रपंक्तिमा रहेका सैनिकहरू मात्र होइन, सर्वसाधारण नागरिक पनि खाद्य अभाव, विस्थापन र मानसिक तनावबाट प्रभावित भइरहेका छन्।
संयुक्त राष्ट्रसंघीय निकायहरू र मानवीय संस्थाहरूले युद्धग्रस्त क्षेत्रमा खाद्य सहायता पु¥याउन प्रयास गरिरहे पनि निरन्तरको हिंसा र अवरोधका कारण अवस्था जटिल बन्दै गएको बताइएको छ।
© 2026 All right reserved to khabarcnter.com | Site By : Sobij
