२०८३ बैशाख २९ गते मंगलवार
२०८३ बैशाख २९ गते मंगलवार
काठमाडौं । श्रम, रोजगार तथा सामाजिक सुरक्षा मन्त्री रामजी यादवको सचिवालयमा कार्यरत मुस्तकिम मियाँ गम्भीर अपराध सम्बन्धी कसुरमा पक्राउ परेका छन् ।
सप्तरीको महादेवा बल्थी घर भई राजविराजको पाख्रेल टोल बस्ने २७ वर्षीय मुस्तकिम मियाँ अपहरण तथा शरीर बन्धक सम्बन्धी कसुरमा पक्राउ परेका हुन् ।
मियाँलाई सोमबार राजविराजबाट पक्राउ गरिएको सप्तरीका एसपी गौतम केसीले बताएका छन् । मियाँ सहितको समूह मिलेर २०८२ फागुन १४ मा राजु कुमार चौधरीलाई अपहरण गरेर लुटपाट गरेको आरोप छ ।
दुईवटा मोटरसाइकलमा आएका मियाँको समूहका युवाहरूले बन्दुक देखाएर आफूलाई कब्जामा लिएर सुनसान खाली चौरमा लगेर बन्धक बनाई कुटपिट गरेको पीडितको आरोप छ ।
धम्की दिएर उनीहरूले भुईँमा थुकेर चाट्न लगाउँदै मोबाइल, २ तोला सुनको सिक्री र नगद १ लाख ३० हजार लुटेर नाङ्गै छाडेर हिँडेको पीडितले प्रहरीलाई बताएका छन् । अपहरणमा संलग्न अरू ३ जना फरार छन् ।
मुस्तकिम मियाँ समेतका आरोपीहरू विरुद्ध अपहरण वा शरीर बन्धक र अपमानजनक, अमानवीय व्यवहार सम्बन्धी कसुरमा जाहेरी दर्ता गरेर अनुसन्धान भइरहेको एसपी केसीले बताएका छन् ।
© 2026 All right reserved to khabarcnter.com | Site By : Sobij
