२०८३ बैशाख २९ गते मंगलवार
२०८३ बैशाख २९ गते मंगलवार
काठमाडौं । भक्तपुरको सूर्यविनायकदेखि काभ्रेपलाञ्चोकको धुलिखेलसम्म छ लेनमा विस्तार भइरहेको सडक आयोजनाको निर्माण कार्यमा ढिलासुस्ती भएपछि स्थानीय तह र सरोकारवाला निकायले चासो व्यक्त गरेका छन्। बनेपामा आयोजना निर्माण व्यवसायी तथा सरोकारवालाबिच भएको छलफलमा वर्षायामअघि यात्रुलाई सहज आवागमनको व्यवस्था मिलाउन निर्माण कार्य तीव्र बनाउन जोड दिइएको हो।
छलफलमा सडक विस्तारअन्तर्गत बनेपा क्षेत्रका सर्भिस लेन तथा सहायक सडकहरू अवरोधरहित रूपमा सञ्चालनमा ल्याउने प्रतिबद्धता निर्माण पक्षले जनाएको छ। पुलबजार क्षेत्रमा वर्षायाममा हुने डुबान रोक्न पुण्यमाता खोला गहिर्याउने, सफाइ गर्ने तथा संरक्षणका काम अगाडि बढाइने जनाइएको छ। खोलामाथिको पुलको सुरक्षाका लागि आवश्यक संरचनात्मक काम शीघ्र सम्पन्न गरिने तयारी गरिएको छ।
सरोकारवालाले मुख्य सडक पूर्ण रूपमा कालोपत्र गर्न तत्काल सम्भव नभए पनि कम्तीमा सर्भिस ट्र्याक सञ्चालनयोग्य र सुरक्षित राख्नुपर्नेमा जोड दिएका छन्। आयोजनाका अनुसार सूर्यविनायक–धुलिखेल सडक विस्तारको समग्र भौतिक प्रगति हाल करिब ७० प्रतिशत पुगेको छ। करीब १५.८ किलोमिटर लामो उक्त सडक आयोजना तीन वर्षअघि सुरु गरिएको हो। पछिल्ला दुई महिनायता निर्माणको गति सुस्त बनेको छ।
निर्माण सामग्रीको अभाव, मूल्यवृद्धि तथा बजारको असहज अवस्थाका कारण काम प्रभावित भएको निर्माण कम्पनीहरूको भनाइ छ। यसअघि चालु आर्थिक वर्षभित्र अधिकांश काम सम्पन्न गर्ने लक्ष्य राखिए पनि हाल सो लक्ष्य प्रभावित बनेको देखिएको छ ।
© 2026 All right reserved to khabarcnter.com | Site By : Sobij
