२०८२ चैत्र ५ गते बिहिवार
२०८२ चैत्र ५ गते बिहिवार
काठमाडौं । राष्ट्रिय स्वतन्त्र पार्टी (रास्वपा)का शीर्ष नेताहरू सरकार गठनको छलफलमा जुटेका छन् । उपसभापति डा. स्वर्णिम वाग्लेले सरकार गठनको छलफलमा जुटेको जानकारी दिएका छन् ।
बिहीबार सामाजिक सञ्जाल फेसबुकमा शीर्ष नेताबीचको तस्वीर पोस्ट गर्दै उनले छलफलमा जुटेको उल्लेख गरेका हुन् । ‘राजकाज । आज साँझको छलफल’ सभापति रवि लामिछाने, वरिष्ठ नेता बालेन्द्र शह (बालेन), उपसभापति डोलप्रसाद अर्याल र आफू सहभागी तस्वीर पोस्ट गर्दै उनले लेखेका छन् ।
राजधानीकै एक होटलमा सरकार गठनको प्रक्रियाको विषयमा उनीहरूले छलफल गरेका हुन् । निर्वाचन आयोगले बिहीबार प्रतिनिधिसभा निर्वाचनको प्रतिवेदन राष्ट्रपति रामचन्द्र पौडेलसमक्ष पेस गरेको छ ।
दुई तिहाइ हाराहारीको दल रास्वपाले संसदीय दलको नेता चयन गरेपछि नयाँ सरकार गठनको आह्वान गर्ने तयारीमा राष्ट्रपति रामचन्द्र पौडेल छन् । निर्वाचन आयोगले बिहीबार नै समानुपातिकतर्फबाट विजयी हुने सांसदलाई प्रमाणपत्र वितरण गरेको थियो ।
रास्वपाले विधान संशोधन गरेर बालेनलाई संसदीय दलको नेता बनाउने बाटो खोल्ने तयारी गरेको छ । चुनाव अघि रास्वपाले बालेनलाई संसदीय दलको नेता र भावी प्रधानमन्त्रीको उम्मेदवार बनाउने घोषणा गरेको थियो ।
एकल बहुमत प्राप्त गरेपछि रास्वपाले एकल सरकार बनाउँदैछ । सरकारमा सहभागी हुने अर्थ, गृहसहितका प्रभावशाली मन्त्रालयमा कसलाई पठाउने भन्नेमा शीर्ष नेताहरू छलफलमा जुटेका हुन् । अर्थमा वाग्ले र गृहमा अर्यालकाे नाम चर्चामा छ । यस्तै परराष्ट्रमा शिशिर खनालकाे नाम चर्चामा रहेकाे छ ।
© 2026 All right reserved to khabarcnter.com | Site By : Sobij
