२०८२ फाल्गुण ९ गते शनिवार
२०८२ फाल्गुण ९ गते शनिवार
काठमाडौं । स्वास्थ्य तथा जनसङ्ख्या मन्त्रालयले चालु कार्यक्रमबाट ७५ करोड ९ लाख १२ हजार रुपैयाँ रकमान्तर गरेर आर्थिक संकटमा परेको स्वास्थ्य बीमा कार्यक्रम बचाउने प्रयास सुरु गरेको छ ।
स्वास्थ्य बीमा बोर्डलाई जोगाउन २२ शीर्षकबाट ७५ करोड ९ लाख १२ हजार रुपैयाँ रकमान्तर गरिएको मन्त्रालयका प्रवक्ता डा. प्रकाश बुढाथोकीले जानकारी दिए ।
मन्त्रालयले आर्थिक वर्षको चालु बजेटबाट रकमान्तर गर्न सक्छ । त्यही प्रावधान अनुरूप कम महत्त्वपूर्ण शीर्षकका लागि छुट्ट्याइएको रकम रकमान्तर गरिएको जानकारी प्रवक्ता बुढाथोकीले दिए ।
बीमा बोर्ड सेवा प्रदायक अस्पताललाई भुक्तानी गर्न नसक्ने अवस्थामा पुगेको छ । बोर्डले भुक्तानी रोकेपछि धेरै अस्पतालले स्वास्थ्य बीमाका कार्यक्रम रोकेका छन् । त्यसपछि मन्त्रालयले यसबारे चासो देखाएर चालु आर्थिक वर्षका विभिन्न कार्यक्रम कटौती गर्दै स्वास्थ्य बीमा बोर्डमा रकमान्तर गरेको हो ।
बोर्डले अहिलेसम्म सेवा प्रदायक अस्पताललाई तिर्न ११ अर्व रुपैयाँ बराबरको दायित्व छ । त्यो दायित्व प्रत्येक महिना २ अर्बका दरले थपिँदै जाने अवस्था रहेको प्रवक्ता डा. बुढाथोकीले जानकारी दिए ।
स्वास्थ्य बीमाको भुक्तानी नपाउँदा आर्थिक संकटमा परेको भन्दै ठुला सरकारी अस्पतालहरूले बीमा कार्यक्रमबाट हात झिक्न सुरु गरेपछि दबाबमा परेको मन्त्रालयले थोरै रकम भए पनि रकमान्तर गरेर बचाउने प्रयास थालेको हो ।
मन्त्रालयको निर्णयानुसार अर्थ मन्त्रालयले रकम रकमान्तर गरेर स्वास्थ्यमा पठाइसकेको छ । स्वास्थ्य मन्त्रालयका प्रवक्ता डा. बुढाथोकीले रकमान्तरमा ५ लाखदेखि ५० करोड रुपैयाँसम्मका शीर्षक समेटिएका र यी कार्यक्रम काटिँदा ठुलो असर नपर्ने जानकारी दिए ।
© 2026 All right reserved to khabarcnter.com | Site By : Sobij
