२०८२ पौष १ गते मंगलवार
२०८२ पौष १ गते मंगलवार
सरकारद्वारा गठित वार्ता समिति र नागरिक बचाउ अभियानका टोलीबीच वार्ता सुरु भएको छ । सञ्चार तथा सूचना प्रविधि मन्त्रालयमा वार्ता भइरहेको हो । वार्तामा सरकारको तर्फबाट सञ्चारमन्त्री जगदीश खरेल, प्रधानमन्त्रीका मुख्य सल्लाहकार अजयभद्र खनाल, जनसम्पर्क सल्लाहकार गोविन्दनारायण तिमिल्सिना तथा नागरिक बचाउ अभियानका प्रेमदिप लिम्बू, देवीप्रसाद सङ्ग्रौला, प्रेम थापामगर सहभागी छन् ।
अधिवक्ताद्वय विनोदमणि भट्टराई र लवण न्यौपानेले वार्ताको सहजीकरण गरेका छन् । आजको वार्ताको निचोडपछि अभियानको संयोजक दुर्गा प्रसाईंसहितको टोलीले प्रधानमन्त्री सुशीला कार्कीसँग वार्ता गर्ने जनाइएको छ । सरकारले निर्वाचनका साथै राजनीतिक वातावरण बनाएर सहज रूपमा निर्वाचन सम्पन्न गर्नका लागि वार्ता र संवाद गरिरहेको हो ।
सरकारले विभिन्न राजनीतिक दल र सरोकारवालासँग वार्ता गर्न केही दिनअघि उच्चस्तरीय राजनीतिक संवाद समिति गठन गरेको थियो । कानुनमन्त्री अनिल सिंहाको संयोजकत्वमा गठित समितिमा सञ्चारमन्त्री खरेल र प्रधानमन्त्रीका प्रमुख राजनीतिक सल्लाहकार खनाल रहेका छन् ।
उक्त समितिअन्तर्गत राजनीतिक दल र विभिन्न पक्षहरूसँग वार्ता गर्न सञ्चारमन्त्री खरेलको संयोजकत्वमा छुट्टै समिति गठन गरिएको थियो । सोही समितिले आज अभियानका टोलीसँग वार्ता गरेको हो ।
© 2025 All right reserved to khabarcnter.com | Site By : Sobij
