२०८२ मंसिर १४ गते आइतवार
२०८२ मंसिर १४ गते आइतवार
काठमाडौं । नेपालको निर्माण क्षेत्रमा देखिएको सुस्ततालाई चिर्दै बजार चलायमान बनाउने उद्देश्यले काठमाडौंमा ‘घर निर्माण फेस्ट २०८२’ आयोजना हुने भएको छ । घर निर्माण फाउन्डेसनको आयोजनामा पुस १२ देखि १५ गतेसम्म भृकुटीमण्डपमा हुन लागेको हो ।
निर्माण सम्बन्धी नेपालको सबैभन्दा ठुलो मेलाका रूपमा लिइएको छ । फाउन्डेसनका अनुसार नेपालमा निर्माण तथा व्यावसायिक गतिविधि विस्तार भइरहेको भए पनि धेरै ब्रान्डहरूले उत्पादनको प्रभावकारी प्रस्तुति, ग्राहकसँग सम्बन्ध विस्तार र बजारमा प्रतिस्पर्धी ब्राण्डिङ गर्न चुनौती भोगिरहेको छ । ती चुनौती समाधान गर्दै फेस्टले ती कमी-कमजोरीलाई सम्बोधन गर्ने अपेक्षा फाउन्डेसनले लिएको छ ।
चार दिनसम्म चल्ने फेस्टबाट झन्डै २ सय करोड रुपैयाँभन्दा बढीको आर्थिक कारोबार हुने अनुमान आयोजकले गरेको छ । यस्तै निर्माणसम्बन्धी नयाँ प्रविधि, सामग्री र डिजाइनबारे ४० हजारभन्दा धेरै दर्शकले प्रत्यक्ष अवलोकन गर्ने अनुमान गरेको छ ।
ब्राण्डिङ र बजार विस्तारमा चुनौती भोगिरहेका व्यवसायीहरूका लागि यो फेस्टले लक्षित ग्राहकसम्म पुग्ने प्रभावकारी मञ्च प्रदान गर्ने विश्वास लिइएको छ ।
मेलामा एसियन पेन्ट्स, प्लम्बर पाइप, नेपोविट टायल्सजस्ता ठुला कर्पोरेट हाउसहरूको सहभागिता रहनेछ । यसले निर्माण सामग्री उत्पादक, प्राविधिक र उपभोक्तालाई एकै ठाउँमा जोड्दै बीटुबी र बीटुसी सम्बन्ध विस्तारमा टेवा पुर्याउनेछ ।
आकर्षणको रूपमा विश्वकै सबैभन्दा ठुलो आकारको इट्टा र फाउन्डेसनले तयार पारेको विशाल इट्टालाई ‘गिनिज बुक अफ वर्ल्ड रेकर्ड’ मा दर्ता गराउने तयारी भएको जनाएको छ ।
फेस्टमा अवलोकन गर्न आउनेहरूका लागि निर्माणसम्बन्धी जिज्ञासामा विशेषज्ञहरूसँग प्रत्यक्ष र निःशुल्क परामर्श पाउने व्यवस्था गरिएको छ । इन्जिनियर, आर्किटेक्ट, निर्माण सामग्री विशेषज्ञ तथा उद्योगमा अनुभवी व्यक्तिहरूसँग डिजाइन, लागत, गुणस्तर र आधुनिक प्रविधिबारे जानकारी लिन सकिनेछ ।
© 2025 All right reserved to khabarcnter.com | Site By : Sobij
