१. विषेश महाधिवेशनबारे निर्णय गर्न छिट पार्टी बैठक बस्छः काँग्रेस नेता रिजाल 

नेपाली काँग्रेसका नेता एवं पूर्वमन्त्री रमेश रिजालले कार्यसम्पदान समितिको बैठकले गरेको निर्णयका आधारमा पार्टीलाई अगाडि बढाउने बताउनुभएको छ । पार्टी मुख्यालय सानेपामा सञ्चारकर्मीसँग कुरा गर्दै उहाँले यस्तो बताउनुभएको हो । पार्टीको विषेश महाधिवेशन गर्ने/नगर्नेबारे निर्णय गर्न छिटै पार्टीको कार्यसम्पादन समितिको बैठक बस्ने उहाँको भनाइ छ । उहाँले जेन जी आन्दोलनको क्रममा नेपाली काँग्रेसजस्तो अग्रगामी र लोकतान्त्रिक पार्टीका संरचनामाथि भएको आक्रमण निन्दनीय भएको भन्दै खेद व्यक्त गर्नुभयो । 

२. नयाँ पुस्ता नै नयाँ शक्ति र नेपालको भविष्य– डा. बाबुराम भट्टराई
“जेन-जी पुस्ताले उठाएका मुद्दा सामान्य रुपमा नलिऔँ” – डा. बाबुराम भट्टराई

नेपालको राजनीति फेरि एउटा निर्णायक मोडमा आइपुगेको छ । निरन्तरको अस्थिरता, पुराना दलहरूको असफलता, युवापुस्ताको बढ्दो असन्तोष र आन्दोलन, अनि संविधानको प्रयोगमा देखिएको विवादास्पद अवस्थाले नयाँ बहसलाई जन्म दिएको छ । पूर्वप्रधानमन्त्री डा। बाबुराम भट्टराईले सडकमा पोखिएको युवाको अभिव्यक्तिलाई सामान्य विरोधको रूपमा नलिन सबैलाई आग्रह गर्नुभएको छ । उहाँकाअनुसार यो आन्दोलन गहिरो राजनीतिक असन्तोषको परिणाम हो, जसले भविष्यमा नयाँ राजनीतिक संरचना निर्माण गर्ने संकेत दिएको छ ।

३. धनुषाबाट ठूलो परिमाणमा लागुऔषध गाँजा बरामद

सशस्त्र प्रहरीले धनुषाबाट ठूलो परिमाणमा लागुऔषध गाँजा बरामद गरेको छ । विदेह नगरपालिका–३ गोबराहीस्थित बाँसघारीमा लुकाइ राखिएको अवस्थामा ८ सय ३५ किलोग्राम गाँजा सशस्त्र प्रहरीले बरामद गरेको हो । सशस्त्र प्रहरी बल नेपाल नं २ छिन्नमस्ता वाहिनी मुख्यालयको विशेष सूचनाको आधारमा सशस्त्र प्रहरी बल, नेपाल नं. ८ गण धनुषाबाट प्रहरी निरीक्षक हेमन्त लिम्बूको कमाण्डमा खटिएको २७ जनाको टोलीले शुक्रवार सो गाँजा बरामद गरेको हो । 

४. तत्कालीन सरकारको हठ र समाजिक सञ्जालमाथिको प्रतिवन्ध जेन–जी आन्दोलनको मुख्य कारण बन्योः माओवादी नेता पोखरेल

नेकपा (माओवादी केन्द्र) का नेता लिलामणी पोखरेलले तत्कालीन केपी शर्मा ओली नेतृत्वको सरकारको हठ र सामाजिक सञ्जालमाथिको प्रतिवन्ध जेन–जी आन्दोलनको मुख्य कारण भएको टिप्पणी गर्नुभएको छ । पार्टी केन्द्रिय कार्यालय पेरिसडाँडामा सञ्चारकर्मीहरुसँग कुरा गर्दै उहाँले यस्तो टिप्पणी गर्नुभएको हो । विद्यमान शासन प्रणालीभित्र बढ्दै गएको अनियमितता, भ्रष्टाचार र बेरोजगारीले युवामाझ नैराश्यता बढेकोमा सरकारको नेतृत्वमा रहनेहरु परिवारवादमा लिप्त हुँदा युवाहरु आन्दोलित भएको उहाँको भनाइ छ । 

५. जेन–जी आन्दोलनबाट वागमती प्रदेश सभाको ३५ करोड बराबरको क्षति

वागमती प्रदेशको राजधानी हेटौंडामा जेन–जी आन्दोलनबाट प्रदेश सभा भवन पूर्ण रुपमा क्षतिग्रस्त बनेको छ । प्रदेश सभाको हालै सञ्चालनमा ल्याइएको अस्थायी भवन र पुरानो भवन दुवै जेनजीको निशानामा परेको थियो । प्रदेश सभा भवन क्षतिग्रस्त हुदाँ ३० देखि ३५ करोड बराबरको क्षति भएको आँकलन गरिएको छ । हेटौंडामा रहेका अन्य सरकारी संरचना, मन्त्रालय तथा कार्यालयमध्ये सबैभन्दा ठूलो क्षति प्रदेश सभा भवनमै भएको प्रदेश सभा सचिवालयले जनाएको छ । 

६. जेन जी आन्दोलनका मृतकप्रति श्रद्धाञ्जली दिँदै काँग्रेस काठमाडौं महानगर समितिद्वारा दीप प्रज्वलन

नेपाली काँग्रेसको काठमाडौं महानगर समितिको जेन जी आन्दोलनका क्रममा निधन भएकाहरुको शोकमा दीप प्रज्वलन गरेको छ । शनिवार साँझ रत्नपार्कस्थित शान्ति बाटिकामा भेला भइ काठमाडौं महानगर समितिले दीप प्रज्वलन गरी शोक व्यक्त गरेको हो । गत भदौ २३ र २४ गते देशभर भएको जेन जी आन्दोलनका क्रममा ७४ जनाको ज्यान गएको छ । सयौँ मानिसहरु उपचाररत छन् । आन्दोलनका मृतकको चीर शान्तिको कामना गर्दै समितिले दीप प्रज्वलन र श्रद्धाञ्जली अर्पण गरेको हो । 

७. कार्यपालिका, व्यवस्थापिका र न्यायपालिकामाथि भएको आक्रमणको छानविन गरी दोषिलाई कारबाही गर्नुपर्छः नेता गैरे

नेकपा (एमाले) का नेता ठाकुर गैरेले जेन–जी आन्दोलनका नाममा कार्यपालिका, व्यवस्थापिका र न्यायपालिकामाथि भएको आक्रमणको सत्यतथ्य छानविन गरी दोषिलाई कानूनी कारबाही गरिनुपर्ने बताउनुभएको छ । पार्टी केन्द्रय कार्यालय च्यासलमा सञ्चारकर्मीहरुसँग कुरा गर्दै उहाँले यस्तो बताउनुभएको हो । लोकतान्त्रिक प्रणालीमा राजनीतिक दल नै मुल आधार भएको उल्लेख गर्दै उहाँले  दलहरुले आफ्ना कमजोरी सच्याउँदै देशलाई बलियो लोकतन्त्रको दिशामा लैजानुपर्नेमा जोड दिनुभयो । 

८. अन्तरिम सरकारको अबको अर्जुनदृष्टिः ‘शान्ति, सुशासन र निर्वाचन’

वि.सं.२०८२ साल हरेक नेपालीका लागि अविष्मरणीय रह्यो । ०८२ को भदौ २३ र २४ गते भएको जेन जी आन्दोलन नेपालको इतिहासमा अब नेपालीहरुले कहिल्यै बिर्सिने छैनन् । जेन जी आन्दोलनबाट प्राप्त उपलब्धिसँगै विध्वंशलाई हरेक नेपालीले स्मरण गर्नेछन् । पुराना नेता र राजनीतिक दलहरुको पञ्जाबाट जेन जीले देशलाई पार लगाउँछन् वा त्यही पुराना राजनीतिक दल र पुरानै नेताहरु मध्यावधि निर्वाचनबाट शासन सत्तामा पुग्छन् त्यो अझै हेर्न बाँकी नै छ । अन्तरिम सरकारले फागुन २१ मा प्रतिनिधि सभाको निर्वाचन गराउने मिति नै तोकिसकेको छ । भदौ २७ मा जेन जीको समर्थनमा सुशीला कार्कीलाई राष्ट्रपति रामचन्द्र पौडेलले प्रधानमन्त्री नियुक्त गर्नुभएको थियो । अहिले चार सदस्यीय मन्त्रीमण्डल विस्तार भइसकेको छ भने अझै विस्तार हुने क्रम जारी छ । 

९. जेन—जी आन्दोलनको बलिदानी खेर जाने अवस्था आए गोली खान तयार छौँः घाइते परिवार

जेनजी आन्दोलनको घाइते परिवार सरस्वती रावलले जेन—जी आन्दोलनको बलिदानीलाई सरकारले सम्बोधन गनुपर्ने बताउनुभएको छ । शनिवार काठमाडौंमा आयोजित पत्रकार सम्मेलनमा उहाँले जेन—जी आन्दोलनको बलिदानी खेर जाने अवस्था आए आफू गोली खान तयार भएको बताउनुभएको हो । जेन—जी आन्दोलन परिवर्तनको लागि सुशासनको पक्षमा र भ्रष्ट्राचारको विरुद्धमा शुरु भएको उहाँको भनाई छ । आन्दोलनमा जेनजीहरुको ठूलो संख्यामा बलिदानी भएको उहाँले बताउनु भयो । हजारौँको संख्यामा घाइतेहरु छन् । 

१०. दशैँ मनाउन घर जानेहरुको चहलपहल बढ्यो

राजधानीबाट गाउँघरमा दशैँ मनाउन जानेहरुको चहलपहल शुरु भएको छ । नयाँ बसपार्क लगायतका बस छुट्ने स्थानहरुमा घर जानेहरुको संख्या दिनानुदिन बढ्दै गएको छ । काम र पढाईको सिलसिलामा राजधानीमा रहेकाहरु दशैँ मनाउनको लागि घर फर्किन थालेका हुन् । यातयात व्यवसायीहरुले दशैँका लागि अग्रिम टिकट बुकिङ खुला गरेका छैनन् । टिकट बुकिङ खुला नभएका कारण मानिसहरु यसपटक घटस्थापना अगाडदेखि नै घर जान थालेका हुन् । जेनजी आन्दोलनका कारण देशमा उत्पन्न भएको राजनितिक परिस्थितिले अधिकांश विद्यालय, क्याम्पसहरु विदा भइसकेका छन् । 

११. दशैँमा काठमाडौंबाट बाहिरिने सार्वजानिक सवारीलाई सुरुङमार्ग प्रयोग गर्न दिइने

सरकारले दशैँमा काठमाडौंबाट बाहिरिने सार्वजानिक सवारीलाई नागढुंगा–सिस्नेरी सुरुङ्गमार्ग प्रयोग गर्न दिने निर्णय गरेको छ । शनिवार उर्जा, शहरी विकास तथा भौतिक पूर्वाधार तथा यातायातमन्त्री कुलमान घिसिङको अध्यक्षतामा बसेको सरोकारवालाहरुको बैठकले सो निर्णय गरेको हो । भौतिक पुर्वाधार तथा यातयातमन्त्री घिसिङले नागढुंगा–सिस्नेरी सुरुङ्गमार्गलाई परिक्षणको रुपमा सार्वजानिक सवारीलाई दशैँ अगाडी नै सञ्चालन गर्ने बताउनु भयो ।

१२. विशेष परिस्थितिमा बाहेक ६ घण्टाभित्र अवरुद्ध सडक खुल्छः सचिव शर्मा

भौतिक पूर्वाधार तथा यातायात मन्त्रालयका सचिव केशवकुमार शर्माले अवरुद्ध बनेका सडकहरु विशेष परिस्थितिमा बाहेक ६ घण्टाभित्र सडक खुल्ने गरी काम अगाडी बढाएको बताउनुभएको छ । शनिवार भौतिक पूर्वाधार तथा यातायातमन्त्री कुलमान घिसिङको अध्यक्षतामा बसेको बैठकमा उहाँले चाडपर्वमा यातायात सहज बनाउनेगरी सडक विभागले काम गरिरहेको जानकारी दिनुभएको हो । हाल मौसमका कारण सडक अवरुद्ध भएको उल्लेख गर्नुहुँदै उहाँले सडक खुलाउन मन्त्रालय र सडक विभागको टिम सक्रिय रहेको बताउनु भयो । 

१३. इजरायली सेनाद्वारा गाजामा भएको हवाई आक्रमणमा हमासका वरिष्ठ लडाकु मारिएको दाबी

इजरायली सेनाले शुक्रवार इजरायली सुरक्षा एजेन्सीसँगको समन्वयमा गाजा पट्टीमा आक्रमण गरेको र एक वरिष्ठ हमास नेताको मृत्यु भएको बताएको छ । सेनाद्वारा जारी विज्ञप्तिअनुसार उत्तरी गाजा पट्टीमा कार्यरत सेनाले हवाई आक्रमणको निर्देशन दिएको थियो । जसमा हमासको बुरेइज बटालियनका सैन्य गुप्तचर उपप्रमुख सिम महमूद युसुफ अबु अलखिरको मृत्यु भएको बताइएको छ । 

१४. इयु आयोगद्वारा रूसमाथि १९ औं प्रतिवन्ध प्याकेज प्रश्ताव

युरोपेली आयोगका अध्यक्ष उर्सुला भोन डेर लेयनले शुक्रवार रूसमाथि प्रतिवन्धको १९ औं प्याकेजको लागि आयोगको प्रश्ताव घोषणा गर्नुभएको छ । जुन मुख्यतया ऊर्जा र वित्तीय क्षेत्रहरूलाई लक्षित गरेको छ । एक विज्ञप्तिअनुसार युरोपेली संघले ब्लकको बजारमा रूसी तरल प्राकृतिक ग्यासको आयातमा प्रतिवन्ध लगाउने र रूसी कच्चा तेलको मूल्य सीमा प्रति ब्यारेल ४७.६ अमेरिकी डलरमा घटाउने योजना बनाएको छ । रूसी ऊर्जा कम्पनीहरू रोसनेफ्ट र ग्याजप्रोम्नेफ्टले पूर्ण व्यापार प्रतिवन्धको सामना गर्नेछन् । 

१५. ट्रम्पद्वारा रोजगारदाताहरूको लागि एच प्लस १ बी भिसा शुल्क बढाएर १ लाख अमेरिकी डलर पु¥याउने घोषणामा हस्ताक्षर

अमेरिकी राष्ट्रपति डोनाल्ड ट्रम्पले शुक्रवार एच प्लस १ बीआवेदकहरूलाई प्रायोजित गर्न कम्पनीहरूले तिर्ने शुल्क बढाएर १ लाख डलर पु¥याउने घोषणामा हस्ताक्षर गर्नुभएको छ । यो कदम संयुक्त राज्य अमेरिकाले उच्च दक्ष प्रतिभा ल्याउने कुरा सुनिश्चित गर्न रहेको बताइएको छ । जसलाई अमेरिकी कामदारहरूले प्रतिस्थापन गर्न सक्दैनन् । कार्यक्रमको प्रणालीगत दुरुपयोगमार्फत अमेरिकी कामदारहरूको ठूलो मात्रामा प्रतिस्थापनले अमेरिकाको आर्थिक र राष्ट्रिय सुरक्षा दुवैलाई कमजोर बनाएको घोषणामा भनिएको छ । 

१६. पाकिस्तानमा बम विस्फोटः ६ जनाको मृत्यु

पाकिस्तानको दक्षिणपश्चिम बलुचिस्तान प्रान्तमा बिहीवार भएको विस्फोटमा ६ जनाको मृत्यु भएको छ । अर्का एक जना घाइते भएको अधिकारीहरूले बताएका छन् । पाकिस्तान–अफगानिस्तान सीमा नजिकै रहेको चमन जिल्लाको ट्याक्सी स्ट्यान्डमा विस्फोट भएको थियो ।  उद्धार ११२२ का अनुसार पीडितहरूलाई जिल्ला मुख्यालय अस्पतालमा सारिएको छ । घाइतेहरूको अवस्था गम्भीर छ । घटनाबारे थप अनुसन्धान भइरहेको र सुरक्षा बलले घटना क्षेत्रलाई घेराबन्दी गरेको छ । अहिलेसम्म कुनै पनि समूहले आक्रमणको जिम्मेवारी लिएको छैन । 

१७. रूसी आणविक पनडुब्बीहरूद्वारा ओखोत्स्कको समुन्द्रमा क्षेप्यास्त्र प्रक्षेपण

रूसको प्रशान्त महासागरको दुई आणविक शक्ति सम्पन्न पनडुब्बीहरूले ओखोत्स्कको समुन्द्रमा नौसेना अभ्यासको क्रममा क्रूज क्षेप्यास्त्रहरू सफलतापूर्वक प्रक्षेपण गरेको फ्लीटले शुक्रवार जनाएको छ । बहुउद्देश्यीय पनडुब्बीहरू क्रास्नोयास्र्क र ओम्स्कले २५० किलोमिटरभन्दा बढी टाढा रहेको तोकिएको समुन्द्री लक्ष्यमा ओनिक्स र ग्रानिट क्रूज क्षेप्यास्त्रहरू प्रहार गरेको फ्लीटको प्रेस सेवाले एक विज्ञप्तिमा जनाएको छ । अनुगमन तथ्याङ्कले देखाएको छ कि तीनवटै क्षेप्यास्त्रहरू सिधै लक्ष्यमा प्रहार गरेका थिए । 

१८. स्वास्थ्य मन्त्रालयको भवन काम लाग्ने अवस्थामा छैनः इन्जिनियर्स एशोशिएशन

नेपाल इन्जिनियर्स एशोसिएशनले स्वास्थ्य तथा जनसंख्या मन्त्रालयको भवन ध्वस्त भएको जनाएको छ । एशोसिएशनका अध्यक्ष सुवासचन्द्र बरालले जेन्जी आन्दोलनको क्रममा आगजनी, तोडफोड भएको सो मन्त्रालयको भवन तत्कालका लागि प्रयोगमा ल्याउन नसक्ने अवस्थामा रहेको प्रारम्भिक निरीक्षणले देखाएको बताउनुभएको हो । शनिवार सो मन्त्रालय परिसरमा सञ्चारकर्मीहरुले राखेका जिज्ञासाको जवाफ दिनेक्रममा उहाँले सर्वोच्च अदालतको पनि उत्तरतिरको भाग कामै नलाग्ने अवस्थामा रहेको बताउनु भयो । दक्षिणतिरको भाग भने काम लाग्ने अवस्थामा रहेको आफूहरुको प्रारम्भिक निरीक्षणले देखाएको अध्यक्ष बरालले बताउनु भयो । 

१९. स्वास्थ्य मन्त्रालयको सफाई अभियानमा जुटे सहकारी पीडितहरु

जेनजी प्रदर्शनकारीहरुले ध्वस्त बनाएको स्वास्थ्य तथा जनसंख्या मन्त्रालयको सफाई अभियानमा सहकारी पीडितहरु समेत सहभागी भएका छन् । शनिवार काठमाडौंको रामशाहपथस्थित सो मन्त्रालयमा उनीहरु सफाई अभियानमा जुटेका हुन् । सो मन्त्रालयको भवनबाट नै छिट्टै सेवाग्राहीको काम हुनसक्ने वातावरण निर्माणमा लागि आफूहरु पनि सफाई अभियानमा सहभागी भएको सहकारी पीडित कुशलभ केसीले जानकारी दिनुभयो । -न्युज एजेन्सी नेपाल