२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । लोडसेडिङ अन्त्य गरेर राष्ट्रिय पहिचान बनाएका नेपाल विद्युत प्राधिकरणका पूर्व कार्यकारी निर्देशक कुलमान घिसिङले खाडी मुलुक बहराइनबाट ‘उज्यालो अभियान’ सुरु गर्ने घोषणा गरेका छन्। नेपाली समुदायको अभिनन्दन कार्यक्रममा सहभागी हुँदै उनले यो अभियान देशका अँध्यारा पक्षहरू उज्यालोमा रूपान्तरण गर्ने सामाजिक प्रतिबद्धता भएको बताएका छन्।
बहराइनवासी नेपालीहरूले आयोजना गरेको नागरिक सम्मान समारोहमा घिसिङले आफू कुनै पनि राजनीतिक दल, सरकार वा संस्थाको प्रतिनिधिका रूपमा होइन, एक जिम्मेवार नागरिकका रूपमा उपस्थित भएको प्रस्ट पारे। "म कुनै पार्टीको झन्डा लिएर आएको होइन। म यहाँ घोषणा गर्न होइन, तपाईहरूलाई साथ दिन आएको हुँ," घिसिङले भने।
उनले बहराइनलाई ‘उज्यालो अभियान’को सुरुआती केन्द्र बनाउने जनाउँदै भने, "अब उज्यालो भन्नाले केवल विद्युत होइन, सामाजिक, आर्थिक र नेतृत्वका अँध्यारोलाई हटाउनु हो।" लोडसेडिङ अन्त्य गर्नु, घाटामा गएको विद्युत प्राधिकरणलाई नाफामा ल्याउनु, देशभर विद्युतीकरण गर्नु र भारत–बंगलादेशसम्म विद्युत निर्यात गर्नु आफ्नो ३० वर्षे सेवाको नतिजा भएको उनले उल्लेख गरे।
राजनीतिमा प्रवेशबारे उठिरहेका चासोका सन्दर्भमा उनले स्पष्ट पारे, "देशको समग्र परिवर्तनको कुरा गर्दा त्यो क्षेत्र राजनीति पनि हुन सक्छ, तर अहिले म छलफलकै चरणमा छु। नेतृत्वप्रति जनताको भरोसा घट्दै गएको छ, यसलाई फर्काउन अब राम्रा मान्छेलाई अगाडि ल्याउनुपर्छ।"
बहराइनपछि उनले युएई, ओमान र कतारमा नेपाली संघसंस्थाहरूले आयोजना गरेका कार्यक्रममा सहभागी हुने छन् भने अगस्टमा अमेरिका र बेलायत जाने कार्यक्रम रहेको उनको सचिवालयले जानकारी दिएको छ।
कुलमानको यो अभियानले उनलाई सम्भावित सामाजिक नेतृत्व वा राजनीतिक भूमिकातर्फ अग्रसर गरिरहेको संकेत दिइरहेको छ। उनका पछिल्ला अभिव्यक्तिहरूले जनतामाझ व्यापक उत्सुकता र अपेक्षा दुवै बढाइरहेका छन्।
© 2025 All right reserved to khabarcnter.com | Site By : Sobij
