काठमाडौं । नेकपा (माओवादी केन्द्र) निकट अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी)को अध्यक्षमा दिपेश पुनको चर्चा चुलिएको छ । 

यहीँ असोज १० देखि १४ सम्म काठमाडौंमा हुने अखिल (क्रान्तिकारी)को २३औँ राष्ट्रिय सम्मेलनबाट नयाँ नेतृत्व चयन हुनेछ । नेतृत्वका लागि आधा दर्जन बढी आकांक्षी देखिएका छन् । 

तीमध्येबाट पार्टी संस्थापन पक्षले नै दिपेश पुनलाई अगाडि सारेको चर्चा छ । उनी सहकारी बचत अपचलन तथा सुन तस्कर काण्डमा मुछिएका थिए । दिपेश सहकारी ठगीमा धरौटीमा छुटेका थिए । 

उनैलाई अखिल (क्रान्तिकारी)को अध्यक्ष बनाउने चर्चाले जिल्लाबाट काठमाडौं आएका विद्यार्थी प्रतिनिधि स्तब्ध भएका छन् । नयाँ नेतृत्व चयनका लागि निर्वाचन प्रणालीमा जानुको साटो उहीँ टीकेप्रथा हाबी हुनुले संगठनलाई बल नपुग्ने सुदूरपश्चिम प्रदेशका एक प्रतिनिधि बताउँछन् । 

अध्यक्षको आकांक्षीमा नरेश रेग्मी, अच्युत भट्ट, मदन भुल, केशव रावल, दीपेश पुन, जीपी मैनाली, इन्द्र भुसाल, पवन कार्की, नारायण खनाल, प्रविणा अधिकारी र क्षितिज सापकोटा छन् । 

महासचिवका लागि सुधीन पौडल, हेमन्त राई, सुधीर रेग्मी र तृष्णा हमाललगायत छन् । संस्थापन पक्षले पुनलाई अध्यक्षमा अघि सारेको छ । जबकि सम्मेलनको नाराचाहिँ ‘भ्रष्टाचारको अन्त्य र सुशासन सुनिश्चितताका निम्ति हाम्रो आन्दोलन । रोजगार, उत्पादन र समाजवादी शिक्षाका लागि २३औं राष्ट्रिय सम्मेलन’ राखिएको छ ।

पोखरास्थित सूर्यदर्शन सहकारी र रूपन्देहीको सुप्रिम सहकारीबाट दीपेशका नाममा ऋण प्रवाह भएको संसदीय छानबिन विशेष समितिको प्रतिवेदनले देखाएको छ । गोर्खा मिडिया नेटवर्कसँग औपचारिक सम्बन्ध नै नभएका पुनलाई कम्पनीले २ करोड ३४ लाख ऋण तथा पेस्की दिएको छ । उनले सूर्यदर्शन सहकारीबाट पनि ५० लाख ऋण लिएर नतिरेको प्रतिवेदनमा उल्लेख छ ।

सहकारी ठगी प्रकरणमा पक्राउ परी उनी धरौटीमा रिहा भएका थिए । गत वैशाखमा रूपन्देही जिल्ला अदालतका न्यायाधीश श्रीप्रकाश उप्रेतीको इजलासले दीपेशलाई ४ लाख धरौटीमा छाड्ने आदेश दिएको थियो । 

त्यस्तै सुन तस्करीमा संलग्न भएको आरोपमा उनी २०८० चैत २ मा काठमाडौंको धापासीबाट पक्राउ परेका थिए । पूर्वन्यायाधीश डिल्लीराज आचार्य नेतृत्वको सुन तस्करीसम्बन्धी छानबिन गर्न गठित आयोगले दीपेशलाई अनुसन्धानको दायरामा ल्याउन राय दिएको थियो । 

२०८० साउन २ मा त्रिभुवन अन्तर्राष्ट्रिय विमानस्थल भन्सार जाँच पार भएर सिनामंगल पुगेको सवारीसाधनबाट बरामद करिब ६१ केजी सुन तस्करी प्रकरणमा दीपेश चिनियाँ तस्करसँग सम्पर्कमा रहेको देखिएपछि अनुसन्धानको दायरामा ल्याइएको थियो । पछि उनी रिहा भए ।

दिपेश पूर्वउपराष्ट्रति नन्दबहादुर पुनका छोरा हुने भने अखिल (क्रान्तिकारी)का महासचिव हुन् ।