२०८२ भाद्र २५ गते बुधवार
२०८२ भाद्र २५ गते बुधवार
काठमाडौं । काठमाडौंमा दिउँसै रेमिट्यान्स कम्पनीमा लुटपाट भएको छ । बुधबार दिउँसो खुकुरी देखाएर न्युरोडको खिचापोखरीमा रहेको आईएमईमा लुटपाट भएको काठमाडौं प्रहरीले जनाएको छ ।
लुटपाटमा संलग्न ४ जना पक्राउ परिसकेको काठमाडौं प्रहरी परिसरका प्रमुख एसएसपी अशोक सिंहले बताए । उनका अनुसार पक्राउ पर्नेमा दाङका २१ वर्षीय तिलक राउत, १८ वर्षीय दिपुन श्रेष्ठ, कालीकोटका १८ वर्षीय उमेश केसी र ललितपुरका नवीन केसी रहेका छन् ।
उनीहरुले ६ लाख रुपैयाँ लुटेका सञ्चालक हेम मल्ल र गोरख चन्दको दाबी छ । बुधबार दिउँसो साढे ३ बजे लुटपाट भएको र त्यसको केही घण्टामै प्रहरीले उनीहरुलाई नियन्त्रणमा लिएको एसएसपी सिंहले बताए ।
उनीहरुको साथबाट ५९ हजार ७ सय रुपैयाँ फेला परेको र केही रकम खर्च गरिसकेको प्रहरीलाई बताएका छन् । तिलकले २५ हजारको किनमेल गरेको र ७५ हजार रुपैयाँ लागुऔषध किन्नका लागि एक महिलालाई दिएको खुलेको छ ।
यस्तै उनीहरुसँग लागुऔषध खान पुगेका मिलन ढकाल, प्रशन्न मल्ल ठकुरी र सफल आचार्य पनि बानेश्वरस्थित दक्षिणकाली होस्टलबाट पक्राउ परेका छन् । घटनाबारे थप अनुसन्धान भइरहेको एसएसपी सिंहले बताए ।
© 2025 All right reserved to khabarcnter.com | Site By : Sobij
