काठमाडौं । आगामी चैत १० गतेबाट लोकसेवा आयोग पूर्ण रूपमा खाली हुँदै छ। आयोगका अध्यक्ष तथा सदस्यहरूको ६ वर्षीय सेवा अवधि चैत १० गते सकिँदै छ । हाल आयोगमा अध्यक्ष उमेश मैनाली तथा सदस्यहरूमा बिन्द्रा हाडा,अशोक झा, ब्रह्म देव यादव र कृष्णचन्द्र झा छन् । दुई जना सदस्य गोविन्द कुसुम र श्री पुरुष ढकाल भने यसअघि नै रिटाएर भइसकेका छन् ।

आयोगमा हालका ५ जना पदाधिकारी र यसअघि अवकाश लिएका  कुसुम र ढकालको नियुक्त संविधान जारी हुनु अघि २०७१ सालमा सुशील कोइरालाको पालामा गरिएको थियो । संविधानमा भने आयोगमा एक जना अध्यक्ष र ४ जना सदस्य रहने व्यवस्था गरिएको छ । संविधान जारी हुनु अघि नियुक्त गरिएका पदाधिकारीहरू संविधान जारी पछि पनि कायमै रहे । २०७१मा नियुक्त गरिएका सबै पदाधिकारीहरूले चैत १० वाट अनिवार्य अवकाश लिँदै छन् ।

आयोगमा जान हालसालै अवकाश लिएका पूर्व सचिवहरू तथा अवकाश हुनै लागेको बहालवाला सचिवहरूले जान दौडधुप सुरु गरेका छन् । ओली समाजका पदाधिकारी डा. विश्वनाथ ओली आयोगका जान दौडधुप सुरु गरेका छन् ।

प्रधानमन्त्री संरक्षक रहेको ओली समाजमा विश्वनाथ महासचिव हुन् । ओली समाजको चुनाव प्रधानमन्त्री निवास बालुवाटारमा गरिएको थियो । उक्त कार्यक्रममा विश्वनाथलाई समाजको महासचिवमा नियुक्त गरिएको थियो । ओली समाजको महासचिवको नाता जोड्दै विश्वनाथ आयोगमा जान दौडधुप सुरु गरेको स्रोतको भनाइ छ ।  हाल विश्वनाथ वन मन्त्रालयका सचिव पनि हुन । आगामी वैशाखबाट उमेर हदको कारण उनले अनिवार्य अवकाश लिँदै छन् । वन मन्त्रालय स्रोत भन्छ, ‘आयोगमा जाने पक्का भयो भने अवकाश लिनु पहिले नै राजीनामा गर्न ओली तयार छन् ।

केही समय अघि उद्योग सचिवबाट अवकाश लिएका चन्द्र घिमिरे पनि आयोगमा जान लाइन मिलाउँदैन । यसअघि उनी मुख्यसचिव हुने दौडमा थिए । तर सरकारले प्रक्रिया मिचेर शंकरदास वैरागीलाई मुख्य सचिव बनाए पछि घिमिरे मुख्य सचिवको दौडबाट बाहिरिएका थिए । मुख्यसचिव हुन नपाए पनि आयोगको सदस्य हुन घिमिरे दौडधुप सुरु गरेका छन् । उनी सत्तारुढ दल नेपाल कम्युनिस्ट पार्टीसँग निकट मानिन्छन् । नेकपाको विवादमा उनको भित्री समर्थन केपी ओलीसँग रहेको घिमिरे निकट कर्मचारीहरू बत्ताउँछन् ।

यसै गरी यसअघि केही समय अघि सचिवबाट अवकाश लिएका राजीव गौतम, मोहनकृष्ण सापकोटा लगायतका उच्च कर्मचारीहरू पनि आयोगमा जान दौडधुप सुरु गरेका छन् ।

संवैधानिक आयोगहरूको नियुक्तमा पूर्व सचिव तथा सहसचिवहरू प्राथमिकतामा पर्ने गरेका छन् । आयोगमा नियुक्त पाउन सचिव तथा सहसचिवहरू पदमै रहँदा सेटिङ मिलाउने गरेका हुन्छन् । आयोगको निर्देशिका तथा नियमावलीहरूको मस्यौदा बनाउँदा नै उच्च कर्मचारीहरूले आफू अनुकूल हुने गरी बनाएका हुन्छन् । कतिपय अवस्थामा आफूलाई ठ्याम्मै मिल्ने गरी आयोगका पदाधिकारी तथा सदस्य हुनको लागि न्यूनतम योग्यता राखेका हुन्छन् ।