२०८२ भाद्र १ गते आइतवार
२०८२ भाद्र १ गते आइतवार
काठमाडौं । ६ महिनामा शतप्रतिशत बढी दोस्रो बजारमा सेयर बढेको नेपाल टेलिकमको नाफा ३३ प्रतिशतले घटेको छ ।
नेपाल टेलिकमले प्रकाशित गरेको चालु आर्थिक वर्षको दोस्रो त्रैमासिक अवधीको वित्तीय विवरण अनुसार टेलिकमको नाफा ३३ प्रतिशतले घटेको छ । नेपाल टेलिकमले पुस मसान्तसम्ममा ३ अर्ब ३२ करोडले नाफा गरेको छ । अघिल्लो वर्ष टेलिकमको नाफा ४ अर्ब ९३ करोड थियो ।
टेलिकमको आम्दानीको मुख्य स्रोत नै घट्दा नाफा घटेको हो । टेलिकमले ६ महिनामा ग्राहकबाट गरेको आम्दानी १७ अर्ब ७२ करोड छ भने अन्य आम्दानी २ अर्ब ८५ करोड छ । अघिल्लो वर्ष १८ अर्ब ग्राहकबाट र ३ अर्ब ८८ करोड अन्य आम्दानी गरेको थियो ।
भ्वाइसबाट हुने आम्दानी घट्दै गएपछि सेयर बजारमा सूचिकृत सबैभन्दा बढी पूँजीकरण भएको टेलिकमको नाफा भने हरेक वर्ष घट्दो क्रममा छ ।
सेयर बजारमा भने यसको असर देखिएको छैन । ६ महिना अगाडि टेलिकमको सेयर मूल्य दोस्रो बजारमा ६६६ रुपैयाँ थियो । बिहीबार कारोबार बन्द हुँदा यसको सेयर मूल्य प्रतिकित्ता १४१० रुपैयाँ पुगेको छ । १४५० रुपैयाँसम्म यसको सेयर मूल्य पुगेको थियो ।
टेलिकमले गतवर्षको नाफाबाट लाभांश भने वितरण गरेको छैन । नगद लाभांश मात्र दिइरहेको टेलिकमले गतवर्षको नाफबाट बोनस सेयर दिने हल्ला बजारमा छ ।
टेलिकमको वार्षिक उत्सवमा संचारमन्त्री पार्वत गुरुङले सर्वसाधारणको हिस्सा बढाउने बताएका थिए । यसको लागि एफपीओ आउने अनुमान गरिएको छ ।
© 2025 All right reserved to khabarcnter.com | Site By : Sobij
