Logo

२०८२ भाद्र १४ गते शनिवार

२०८२ भाद्र १४ गते शनिवार

प्रहरीको रासन भत्ता बढाउन गृहमन्त्रीले थाले तयारी, पेन्सन अवधि घटाउने हुँदैछ कसरत 

प्रहरीको रासन भत्ता बढाउन गृहमन्त्रीले थाले तयारी, पेन्सन अवधि घटाउने हुँदैछ कसरत 


  • 6.0K
    Shares

    प्रहरीको रासन भत्ता बढाउन गृहमन्त्रीले थाले तयारी, पेन्सन अवधि घटाउने हुँदैछ कसरत 
    images

    काठमाडौं । गृहमन्त्री रामबहादुर थापाले मूल्यवृद्धिअनुरुप नेपाल प्रहरी र सशस्त्र प्रहरी बलको रासन भत्ता तत्काल बढाईने बताएका छन् । रासन भत्ताको पुनरावलोकन सम्बन्धमा गृह मन्त्रालयका सहसचिव थानेश्वर गौतमको नेतृत्वमा बनेको कार्यदलले तयार पारेको प्रतिवेदन ग्रहण गर्दै गृहमन्त्री थापाले प्रतिवेदनको सिफारिसअनुसार तत्काल रासनभत्ता वृद्धिका लागि प्रक्रिया अगाडि बढाउने बताए । उनले आर्थिक वृद्धि र समृद्धिका लागि शान्तिसुरक्षा अनिवार्य शर्त रहेको र शान्तिसुरक्षा कायम गर्न महत्वपूर्ण योगदान गर्ने सुरक्षाकर्मीको मनोबल बढाउन पनि भत्ता वृद्धि गरिने प्रष्ट्याए ।

    लामो समय भत्ता वृद्धि रोकिने अवस्थाको अन्त्य गरी प्रत्येक वर्ष स्वतः भत्ता पुनरावलोकन हुनेगरी गृह मन्त्रालयले समिति बनाउने गृहमन्त्रीले प्रतिबद्धता व्यक्त गर्नुभयो । पछिल्लो छ वर्षदेखि सुरक्षाकर्मीको रासनभत्ता वृद्धि हुन सकेको छैन ।

    सहसचिव गौतम नेतृत्वको कार्यदलले पछिल्लो छ वर्षमा खाद्यान्नमा सरदर ३३ प्रतिशत मूल्यवृद्धि भएको निष्कर्ष निकाल्दै मूल्यवृद्धि र सरकारको वित्तीय स्रोतको उपलब्धता हेरी उपयुक्तमात्रामा रासन भत्ता वृद्धि गर्न सिफारिस गरेको हो । आजको उक्त कार्यक्रममा गृहसचिव, नेपाल प्रहरी र सशस्त्र प्रहरी बलका महानिरीक्षककोसमेत उपस्थिति रहेको थियो ।

    नेपाली सेनामा पेन्सन अवधिसम्बन्धि तल्लो दर्जाको माग सम्बोधन गर्न प्रधानसेनापति पूर्णचन्द्र थापाले मध्यमार्गी निर्णय गराएका छन् । १६ वर्षमै जागिर छाडे पेन्सन अवधि पाइने तर त्यसको चार वर्षपछि मात्र पेन्सन लिन पाइने नियम बनाएर उनले तल्लो दर्जाको माग सम्बोधन गरेका छन् । सैनिक नियमावली संशोधन गरेर उनले यस्तो निर्णय गराएका हुन् ।

    सेनाको यो निर्णयसँगै गृह मन्त्रालयमा समेत यसबारे छलफल हुन थालेको छ । सेनामा जस्तै प्रहरीमा पनि पेन्सनका लागि न्यूनतम सेवा अवधि २० वर्ष छ । जसलाई १६ वर्ष बनाउन अदालतमा मुद्दा समेत छ । देशका सुरक्षा निकायमा पेन्सन सम्बन्धि फरक फरक व्यवस्था हुन नहुने भन्दै प्रहरीमा पनि १६ वर्षमै पेन्सन अवधि बनाउन गृह मन्त्रालयले छलफल थालेको छ ।

    प्रहरीमा दुःख धेरै, सुविधा कम र सरुवा/बढुवा समेत निष्पक्ष नहुने भएकाले तल्लो तहमा काम गर्ने प्रहरीहरु पेन्सन अवधि पुगेलगत्तै जागिर छाड्न चाहन्छन् । सरकारले उनीहरुको सेवा सुविधा बढाउन सकेको छैन । जसकारण राजिनामा दिने क्रम रोकिएको छैन । पेन्सन लिने र अन्यत्र जागिर खाने प्रवृत्ति सिपाही हवल्दारमा देखिन्छ ।

    उता सुरक्षाकर्मीको रासनभत्ता भने बढ्ने भएको छ । गृह मन्त्रालयका सहसचिव थानेश्वर गौतम नेतृत्वको समिति रासनभत्ता करिब ४० प्रतिशत बढाउन सिफारिस गरेको छ । यसले सुरक्षा निकायमा केही उत्साह बढ्ने अपेक्षा गृहको छ । विगत पाँच वर्षदेखि सुरक्षाकर्मीको रासनभत्ता बढ्न सकेको छैन ।

    प्रकाशित मिति :माघ ३० २०७७ शुक्रवार - १३:४५:०१ बजे
    प्रतिक्रिया

    खबरसेन्टर

    Admin Of Khabar Center.

    सम्बन्धित समाचार

    © 2025 All right reserved to khabarcnter.com | Site By : Sobij