२०८२ माघ १० गते शनिवार
२०८२ माघ १० गते शनिवार
काठमाडौँ । प्रतिनिधिसभा विघटन सम्बन्धमा संवैधानिक इजलासमा सुनुवाइ भइरहेको मुद्दामा प्रधानमन्त्री केपी ओलीले पटकपटक टिप्पणी गरेपछि उनीमाथि अवहेलनाको निवेदन दर्ता भएको छ ।
सर्वोच्च अदालतमा ओलीविरुद्ध अधिवक्ता कुमार शर्माले कारवाहीको माग गर्दै निवेदन पेश गरेका हुन् । ओलीमाथि विचाराधीन मुद्दालाई प्रभावित गर्ने गरी पटकपटक अभिव्यक्ति दिएको, बहस गर्ने वकिलहरुलाई जभाभावी बोलेको आरोप लगाइएको छ ।
इजलासमा बहस गर्न पुगेका वकिलहरुलाई ओलीले तमाशा गर्न पुगेको जस्तो तुच्छ टिप्पणी गरेका थिए । केही दिन अघि ओलीले अधिवक्ता कृष्णप्रसाद भण्डारीलाई बाजे वकिल अदालतमा बहसको नाममा तमासा गर्न गएको भन्दै भद्दा मजाक गरेका थिए ।
यसैबीच, बारका पूर्व अध्यक्षहरु वरिष्ठ अधिवक्ता हरिहर दाहाल, शम्भु थापा, प्रेमबहादुर खड्का र शेरबहादुर केसीले संयुक्तरुपमा विज्ञप्ति निकालेर कानून व्यवसायीमाथि प्रधानमन्त्रीले निर्लज्ज व्यवहार देखाएको आरोप लगाएका छन् ।
ओलीले ‘एकजना बाजे वकिलहरुलाई पनि लिएर गएछन् बहस गर्न, यो के तमासा गरेको हो’ भन्ने अभिव्यक्तिप्रति आपत्ति जनाएका छन् ।
ओलीको अभिव्यक्तिप्रति खेद प्रकट गर्दै उनीहरुले क्षमायाचना गर्न पनि प्रधानमन्त्रीसँग माग गरेका छन् ।
© 2026 All right reserved to khabarcnter.com | Site By : Sobij
